MAJERUHI YAMCHANGANYA GUARDIOLA KATIKA KIKOSI CHAKE.

MENEJA wa klabu ya Bayern Munich Pep Guardiola ana matumaini ya kutopata majeruhi zaidi kufuatia timu hiyo kukumbwa na balaa hilo kuelekea mchezo wao wa mkondo wa kwanza wa robo fainali Ligi ya Mabingwa Ulaya dhidi ya Porto Jumatano ijayo. Mshambuliaji Robert Lewandowski alifunga mabao mawili katika ushindi wa mabao 3-0 waliopata Bayern katika mchezo wa Bundesliga dhidi ya Eintracht Frankfurt jana huku kikosi kikiwa na mabadiliko kutokana na kuwakosa nyota wake. Arjen Robben, David Alaba, Franck Ribery, Bastian Scheinsteiger, Jerome Boateng na Medhi Benatia wote hao waliukosa mchezo huo kutokana na kusumbuliwa na majeruhi na wengine ugonjwa. Mwenyekiti wa Bayern Karl-Heinz Rummenigge amedai kuwa timu hiyo inakosa robo tatu ya wachezaji wake wa kikosi cha kwanza. Guardiola amesema kitu anachoweza kufanya hivi ni kufanya mzunguko katika kikosi chake huku akiwa na matumaini ya kutopata majeruhi zaidi.