TULITUMIA UDHAIFU WA MAN CITY KUWAADHIBU - ROONEY.

MSHAMBULIAJI wa Manchester United, Wayne Rooney amebainisha kuwa yeye pamoja na wachezaji wenzake walikuwa wanafahamu kuwa mahasimu wao Manchester City hawako katika ubora wao kwenye safu ya ulinzi kabla ya mchezo wa Jumapili iliyopita uliofanyika Old Trafford. Katika mchezo huo United iliitandika City mabao 4-2 huku wachezaji wengi wa timu hiyo wakikosolewa kutokana na kukosa nidhamu ya kazi. Rooney amedai kuwa meneja wao Louis van Gaal aliwadokeza wachezaji wake juu ya udhaifu wa wapinzani wao kabla ya mchezo huo. Nyota huyo wa kimataifa ya Uingereza amesema walikuwa wakijua mapema baadhi ya wachezaji wa City hawako katika ubora wao na walitumia udhaifu huo kuwaadhibu jambo ambalo walifanikiwa. Rooney aliendelea kudai kuwa kadri siku zinavyokwenda wanazidi kuimarika huku wakijenga hali ya kujiamini iiyokuwa imepotea miongoni mwao.