UNITED YAKARIBIA KUMSAJILI NYOTA WA UHOLANZI KWA PAUNDI MILIONI 25.

KLABU ya Manchester United inakaribia kukamilisha dili la paundi milioni 25 kwa ajili ya usajili wa nyota wa kimataifa wa Uholanzi Memphis Depay. Akihojiwa meneja wa United Louis van Gaal amesema Depay amekuwa akiwindwa na vilabu mbalimbali vikubwa na kama wakifikia makubaliano mwishoni atafanya uchaguzi wake. Hata hivyo, Van Gaal amesema ana uhakika litakuwa jambo lisilowezekana kuikataa klabu kama United. Van Gaal alisafiri kwenda jijini Amsterdam kumuangalia Depay uwanjani wakati wa mchezo wa kirafiki wa kimataifa ambao Uholanzi iliichapa Hispania mabao 2-0 mwezi uliopita. United wako katika nafasi nzuri ya kumsajili mchezaji huyo pamoja na kuwepo klabu zingine wakiwemo matajiri wa Ufaransa Paris Saint-Germain katika mbio hizo.