DANGOTE ATAKA KUINUNUA ARSENAL.

MFANYABIASHARA bilionea wa Afrika, Aliko Dangote amekiri kuwa bado ana nia ya kuinunua klabu ya Arsenal. Bilionea huyo raia wa Nigeria mwenye umri wa miaka 58, ambaye anakadiriwa kuwa na utajiri wa paundi milioni 10.3 hivyo kumfanya kuwa mtu tajiri zaidi kwa Afrika, alishajaribu kuinunua timu hiyo mwaka 2010. Akihojiwa Dangote amesema bado hajakata tamaa kuhusiana na adhma yake hiyo kwani anaamini siku moja ataweza kufanikisha na kuimiliki timu hiyo. Dangote ambaye amepata utajiri wake kupitia biashara kadhaa ikiwemo kutengeneza saruji, kusambaza sukari na kuwekeza katika mafuta, amesema kwasasa anazingatia jinsi ya kukuza biashara yake kabla ya kutoa ofa mpya ya kuinunua klabu hiyo. Bilionea huyo ni shabiki mkubwa wa Arsenal lakini amekuwa akimkosoa Arsene Wenger akidai kuwa anatakiwa kubadili mbinu zake ili timu hiyo iweze kwenda katika njia sahihi.