UNITED YAKUBALI DILI LA KUMSAJILI DEPAY.

KLABU ya Manchester United imekubali dili la kumsajili mshambuliaji wa kimataifa wa Uholanzi Memphis Depay kutoka klabu ya PSV Eindhoven. Ada ya usajili wa nyota huyo inakadiriwa kuwa kati ya paundi milioni 25 mpaka 30 na mkataba utakaomalizika 2019 huku kukiwa na uwezekano wa kuongeza mwaka mwingine mmoja. Kama akifanikiwa kufaulu vipimo vya afya wiki ijayo, Depay mwenye umri wa miaka 21 anatarajiwa kujiunga na United pindi dirisha la usajili la majira ya kiangazi litakapofunguliwa. Depay amefunga mabao 21 akiwa na PSV msimu huu huku akiwa amewahi kucheza chini meneja Louis van Gaal wakati akiinoa timu ya taifa ya Uholanzi.