WABABE WA YANGA KOMBE LA SHIRIKISHO WAPANGIWA KUIVAA RAJA CASABLANCA.

WABABE wa Yanga katika michuano ya Kombe la Shirikisho timu ya Etoile du Sahel ya Tunisia wamepangwa kucheza na Raja Casablanca ya Morocco katika ratiba ya mtoano iliyopangwa hii leo. Etoile waliiengua Yanga kwa jumla ya mabao 2-1 katika michezo miwili waliyokutana baada ya kutoka sare ya bao 1-1 katika mchezo wa kwanza uliochezwa Dar es Salaam kabla ya kushinda bao 1-0 katika mchezo wao wa marudiano uliochezwa huko Soussa. Timu zingine zilizopangwa katika ratiba hiyo ni pamoja na AC Leopards ya Congo Brazzaville ambao watakwaana na Warri Wolves ya Nigeria, CS Sfaxien ya Tunisia watavaana na ASEC Mimosas ya Ivory Coast, AS Vita ya DR Congo watapambana na Stade Malien ya Mali. Wengine ni Orlando Pirates ya Afrika Kusini watacheza na AS Kaloum ya Guinea, Sanga Balende ya DR Congo itakwaana na Zamalek ya Misri, Esperance ya Tunisia watapepetana na Hearts of Oak ya Ghana na Al Ahly ya Misri watakaoivaa Club Africain ya Tunisia.