COPA AMERICA: THIAGO SILVA AWASIHI WENZAKE KUTOIDHARAU PARAGUAY.

BEKI wa timu ya taifa ya Brazil, Thiago Silva amewaonya wachezaji wenzake kutowadharau tena Paraguay kama wanataka kuepuka kutotolewa tena katika hatua ya robo fainali ya michuano ya Copa America inayoendelea huko Chile. Nahodha huyo wa klabu ya Paris Saint-Germain alikiongoza kikosi cha Brazil katika michuano hiyo mwaka 2011 nchini Argentina ambapo walitolewa na Paraguay katika hatua kama hiyo kwa changamoto ya mikwaju ya penati baada ya kutoka sare ya bila ya kufungana katika muda wa kawaida na nyongeza. Silva amesema bado wana kumbukumbu za kuumiza walizopata miaka minne iliyopita wakati walipotolewa hivyo aliwaasa wachezaji wenzake kutofanya mzaha katika mchezo wao huo. Nyota huyo aliendelea kudai kuwa Paraguay watakuwa wapinzani wagumu hivyo kikubwa cha kuzingatia in kuhakikisha wanatulia na kuwa makini muda wote wa mchezo.