ARSENAL BADO WAMKOMALIA BENZEMA.

KLABU ya Arsenal imeripotiwa kujiandaa kutoa ofa kwa lengo la kumsajili mshambuliaji wa Real Madrid Karim Benzema. Arsenal kwa mda mrefu wamekuwa wakihusishwa na tetesi za kumuwania Benzema na sasa wako tayari kukamilisha lengo lao. Kulingana na gazeti la The Sun, viongozi wa klabu hiyo wanajiandaa kutoa kitita cha dola milioni 40 ili kumtia mkobani raia huyo wa Ufaransa ambaye wanaamini anataka kuondoka nchini Hispania. Meneja mpya wa Madrid Rafa Benitez aliweka wazi mipango yake ya kumtumia mshambuliaji nyota wa timu hiyo Cristiano Ronaldo kama mshambuliaji mkuu. Kwa mpango huo ni wazi Benzema atakuwa hana nafasi katika kikosi cha kwanza cha timu hiyo na mwenyewe hayuko tayari kucheza kama mchezaji wa ziada. Gazeti la The sun lina ripoti kwamba tayari kocha wa Arsenal Arsene Wenger amewasiliana na Real kuhusu uhamisho huo na mazungumzo yanaendelea.