BLIND ACHUKUA MIKOBA ILIYOMSHINDA HIDDINK UHOLANZI.

SHIRIKISHO la Soka la Uholanzi limemteua Danny Blind kuwa kocha wa timu ya taifa ya nchi hiyo. Kocha huyo mwenye umri wa miaka 53 anachukua nafasi ya Guus Hiddink ambaye aliachia nafasi hiyo mapema Jumatatu baada ya kuinoa timu hiyo kwa miezi 10. Blind ambaye alikuwa msaidizi wa Hiddink, amewahi kuichezea Uholanzi mechi 42 enzi zake akisakata kabumbu katika klabu za Ajax Amsterdam na Sparta Rotterdam huku pia akiwahi kuifundisha Ajax. Hiddink mwenye umri wa miaka 68 amepoteza michezo mitano na kushinda minne katika mechi 10 ambazo amekuwa akiiongoza Uholanzi na kuifanya nchi hiyo kushika nafasi ya tatu katika kundi lao la kufuzu michuano ya Ulaya mwakani.