UNITED SASA YAMTOLEA MACHO MULLER KUJA KUZIBA PENGO LA VAN PERSIE.

KLABU ya Manchester United imepanga kutoa kitika cha pound milioni 60 kwa ajili ya kumsajili mshambuliaji wa kijerumani Thomas Muller mwenye umri wa miaka 25 anae ichezea klabu ya Bayern Munich. United itamsajili Mjerumani huyo kama mbadala wa mshambuliaji wao wa kiholanzi Robin Van Persie. Tayari United imekubaliana na klabu ya Fenerbahce ya Uturuki dau la paundi milioni 4.7 kama ada ya uhamisho wa Van Persie na atafanyiwa vipimo vya afya mwishoni mwa wiki hii na kusaini mkataba wa miaka minne ambao utamuwezesha kulipwa mshahara wa paundi 200,000 kwa wiki. Nyota huyo alijiunga na United akitokea Arsenal kwa kitita cha paundi milioni 24 Agosti mwaka 2012 na alianza vyema msimu wake wa kwanza akimaliza kama mfungaji bora wa Ligi Kuu wakati taji likienda Old Trafford. Lakini Van Persie sasa amekuwa sio yule tena kutokana na kuwa chini ya kiwango kutokana na majeruhi yanayomzonga akiwa chini ya meneja Louis van Gaal.