GYAN AINGIA KTIKA ORODHA YA WACHEZAJI WANAOLIPWA ZAIDI.

MSHAMBULIAJI wa kimataifa wa Ghana, Asamoah Gyan anatajwa kuwa mmoja wa wachezaji wanaolipwa vyema duniani baada ya kujiunga na Shanghai SIPG ya china akitokea Al Ain ya Muungano wa Falme za Kiarabu-UAE. Nahodha huyo wa Ghana amekuwa akiichezea Al Ain toka mwaka 2011 baada ya kuondoka Sunderland kwa mkopo na baadae kuchukuliwa moja kwa moja na bado alikuwa na mkataba wa miaka mitatu na klabu hiyo yenye maskani yake Abu Dhabi. Hata hivyo, Gyan anatarajiwa kutambulishwa rasmi kama mchezaji wa Shanghai SIPG wiki ijayo baada ya kusaini mkataba wa miaka miwili na timu hiyo inayoshiriki Ligi Kuu nchini humo maarufu kama Chinese Super League. Shanghai SIPG ambayo inafundishwa na Sven Goran Eriksson, inaripotiwa kuwa wamekubali kumlipa Gyan kitita cha euro 315,000 kwa wiki, hivyo kumfanya kuwa mmoja kati ya wachezaji 10 wanaolipwa fedha nyingi zaidi duniani.