JUVENTUS YACHOMOA KUPOKEA OFA YA VIDAL KUTOKA MADRID.

OFISA mkuu wa klabu ya Juventus, Giuseppe Marotta amekanusha taarifa kuwa Real Madrid wametuma ofa rasmi kwa ajili ya kumuwania Arturo Vidal. Kiungo huyo mwenye umri wa miaka 28 amekuwa kwa kipindi kirefu akihusishwa na tetesi za kuhamia Santiago Bernabeu na kuna taarifa zilivuja jana kuwa tayari Madrid wameshatuma ofa yao rasmi. Hata hivyo, taarifa hizo zilikanushwa na Marotta aliyedai kuwa Madrid bado hawajatoa chochote mpaka sasa na wamekuwa na mahusiano nao mazuri. Akizungumzia kuhusu kuondoka kwa kiungo mkongwe Andrea Pirlo kwenda New York City FC, Marotta amesema itakuwa kazi kubwa kuziba pengo lake katika klabu hiyo. Marotta aliendelea kudai kuwa wachezaji wenye kariba ya Pirlo wako wachache sana hivyo haitaweza kuwa kazi rahisi kutafuta mbadala wake haraka ingawa watajaribu kufanya hivyo.