CARRICK PANCHA.

KIUNGO wa Manchester United, Michael Carrick ameondolewa katika kikosi cha timu ya taifa ya Uingereza kutokana na majeruhi. Uingereza ilifanikiwa kufuzu michuano ya Euro 2016 kwa ushindi mnono wa mabao 6-0 dhidi ya San Marino Jumamosi iliyopita huku James Milner na Jonjo Shelvey wakipata nafasi mbele ya nyota huyo wa zamani wa Tottenham Hotspurs. Mkongwe huyo mwenye umri wa miaka 34 ilikuwa apangwe katika mchezo dhidi ya Switzerland kesho lakini majeruhi hayo yamemfanya kurejea Old Trafford kwa ajili ya matibabu. Taarifa hizo zinaweza zisiwe nzuri kwa meneja wa United Louis van Gaal ambaye amekuwa akimtumia kiungo huyo katika mechi zote nne ambazo timu hiyo imeshacheza hadi hivi sasa.