PULIS ADAI KUMALIZA KIZUNGUMKUTI CHA BERAHINO.

MENEJA wa West Bromwich Albion, Tony Pulis amesema mshambuliaji Saido Berahino ataitumikia klabu hiyo tena pamoja na kwamba haitakuwa jambo rahisi kufuatia mkanganyiko katika suala lake la uhamisho. Nyota huyo wa kimataifa wa Uingereza alitishia kutoichezea tena klabu hiyo baada ya kushindikana kwa uhamisho wake katika dakika za mwisho kwenda Tottenham Hotspurs. Berahino bado amejumuishwa katika kikosi cha Pulis na anategemewa kurejea leo katika mazoezi ya klabu hiyo baada ya kuongezewa muda wa mapumziko. Akihojiwa Pulis amesema kauli ya berahino ilimlenga moja kwa moja mwenyekiti wao Jeremy Peace na haikuwahusu sana wachezaji wenzake, menejimenti, wafanyakazi au mashabiki wa klabu. Pulis aliendelea kudai kuwa gadhabu zake ni kwa Jeremy, hivyo kwa jinsi anavyofahamu ataweza kuitumikia klabu hiyo tena.