INTER MILAN YAZIDI KUCHANJA MBUGA SERIE A.

KLABU ya Inter Milan imekwea kileleni mwa msimamo wa Serie A, kufuatia bao la Fredy Guarin kuwapa ushindi mwembamba wa bao 1-0 dhidi ya mahasimu wao AC Milan jana. Inter iliyoko chini ya Roberto Mancini imeanza vyema msimu huu kwa kushinda mechi zake zote tatu huku wakiendeleza rekodi ya kuwatambia mahasimu wao wa jiji katika Uwanja wa San Siro. Kiungo Guarin raia wa Colombia alifunga bao hilo pekee katika dakika ya 58 ya mchezo huo. Mshambuliaji mahiri Mario Balotelli aliyeingia akitokea benchi alionyesha kubadilika kwa kiasi kikubwa kwani ilibaki kidogo aifungie bao Milan katika mchezo wake wa kwanza toka achukuliwe kutoka Liverpool kwa mkopo, lakini shuti lake liligonga mwamba.