MASHABIKI WA ARSENAL WASHITAKIWA KWA KUBOMOA BANGO LA SPURS.

SEHEMU ya upande wa jukwaa la mashabiki wa Arsenal inetarajiwa kufanyiwa uchunguzi wa polisi na Chama cha Soka cha Uingereza-FA baada ya bango kung’olewa katika Uwanja wa White Hart Lane jana. Baada ya filimbi ya mwisho ya mchezo baina ya timu hiyo dhidi ya wenyeji wao Tottenham Hotspurs, mashabiki walianza kung’oa mabango yaliyokuwa yamebandikwa upande wa jukwaa walilokuwa wamekaa na kulazimisha polisi na wasimamizi wa uwanja kuingilia kati kuwatawanya. Polisi wamethibitisha kuwa watu 10 wamekamatwa kuhusiana na tukio na wanatarajiwa kufunguliwa mashitaka kwa vurugu hizo. Msemaji wa Arsenal amesisitiza kuwa klabu itatoa ushirikiano wowote utakaohitajika katika uchunguzi wowote utakaofanyika. Katika mchezo huo Arsenal walifanikiwa kuwafunga majirani zao hao mabao 2-1 ambayo yote yalifungwa na Mathieu Flamini.