MESSI AAHIDI MAAJABU ZAIDI BAADA YA KUFIKISHA MECHI YAKE YA 100 LIGI YA MABINGWA ULAYA.

MSHAMBULIAJI nyota wa Barcelona, Lionel Messi amewaahidi mashabiki wa timu hiyo maajabu zaidi baada ya kufikisha mechi yake ya 100 katika michuano ya Ligi ya Mabingwa Ulaya wakati walipotoa sare ya bao 1-1 dhdii ya AC Roma. Mabingwa hao watetezi walianza kampeni za kutetea taji lao msimu huu kwa kuondoka na alama moja katika mchezo huo wa ugenini, baada ya bao la maajabu la Alessandro Florenzi alilofunga kutokea katikati ya uwanja kusawazisha lile alilofunga Luis Suarez. Messi ambaye amekuwa mchezaji mwenye umri mdogo zaidi katika soka kufikia rekodi ya kucheza mechi 100 za michauano hiyo. Amesema bado ana uchu na mafanikio zaidi ya hayo. Nyota huyo aliandika katika ukurasa wake wa mtandao wa kijamii wa facebook akieleza furaha yake ya kufikisha idadi hiyo ya mechi katika michuano hiyo huku akiahidi kufanya vyema zaidi kwa ajili ya mashabiki yake. Messi sasa anaingia katika orodha ya wachezaji 33 ambao wamewahi kufikisha idadi hiyo ya mechi za Ligi ya Mabingwa Ulaya zikiwemo zile za kufuzu.