RONALDO KUFUNGUA SHULE 30 ZA SOKA CHINA.

NGULI wa Brazil, Ronaldo anatarajiwa kufungua shule 30 za soka nchini China wakati nchi hiyo ikiendelea na mageuzi kabambe yenye lengo la kuwafanya kuwa vinara wa mchezo huo duniani. Uwekezaji huo unatarajiwa kufanyika katika miji ya Beijing, Shanghai na Shenzhen, Xinhua, huku nguli huyo wa zamani wa klabu za Barcelona, Real Madrid na Inter Milan akitarajiwa kuwepo katika ufunguzi wa kwanza utakaofanyika katika mji mkuu wa Beijing Novemba mwaka huu. Hatua inakuja wakati rais wa China Xi Jinping shabiki mkubwa wa soka ambaye anajaribu kulisukuma taifa hilo ili siku moja wawe wenyeji wa fainali za Kombe la Dunia, kwa kuisafisha taswira ya mchezo huo baada ya kugubikwa na masuala ya rushwa kwa miaka kadhaa nyuma. Ronaldo mwenye umri wa miaka 39 ambaye amewahi kushinda Kombe la Dunia mara mbili akiwa na Brazil amesema kasi ya maendeleo na malengo ya rais Xi Jinping ndio vitu vilivyomsukuma kufanya hivyo.