KAKA AITWA BRAZIL KUZIBA NAFASI COUTINHO.

SHIRIKISHO la Soka la Brazil-CBF limetangaza kumuita kiungo mkongwe Kaka katika kikosi cha timu ya taifa ya nchi hiyo kuziba nafasi ya Philippe Coutinho aliyeondolewa. Maelezo ya majeruhi ya Coutinho hayakuwekwa wazi baada ya kiungo huyo wa Liverpool kucheza dakika zote 90 katika sare ya bao 1-1 waliyopata dhidi ya Everton jana. Kukosekana huko kwa Coutinho kumetoa mwanya kwa Kaka kurejea tena katika kikosi cha nchi hiyo. Kaka anayekipiga katika klabu ya Orlando City alijumuishwa katika kikosi cha Brazil kilichocheza mechi za kirafiki za kimataifa dhidi ya Costa Rica na Marekani mwezi uliopita. Lakini kiungo huyo mwenye umri wa miaka 33 aliakuwa ameachwa katika kikosi cha Dunga ambacho kinajiandaa na mechi za kufuzu michuano ya Kombe la Dunia mwaka 2018 dhidi ya Chile na Venezuela. Brazil wataanza kukipiga na Chile jijini Santiago Alhamisi hiii kabla ya kurejea nyumbani kupambana na Venezuela huko Fortaleza siku tano baadae.