KLOPP APEWA NAFASI KUBWA KUCHUKUA MIKOBA YA RODGERS LIVERPOOL.

MENEJA wa zamani wa Borussia Dortmund Jurgen Klopp ndiye anayepewa nafasi kubwa Liverpool kuchukua mikoba ya Brendan Rodgers ambaye alitimuliwa jana kufuatia sare ya bao 1-1 waliyopata dhidi ya Everton. Kocha huyo raia wa Ireland ya Kaskazini ametimuliwa baada ya kuinoa Liverpool kwa karibu miaka mitatu na nusu huku akiiacha timu hiyo ikishika nafasi ya 10 katika msimamo wa Ligi Kuu hivi sasa. Mpaka sasa hakuna makubaliano yeyote yalioafikiwa na Klopp mwenye umri wa miaka 48 ambaye aliiwezesha Dortmund kunyakuwa mataji mawili ya Bundesliga. Meneja wa zamani wa Real Madrid Carlo Ancelotti naye anapewa nafasi kubwa ya kuchukua mikoba ya Rodgers. Katika taarifa ya klabu hiyo imedai kuwa kwasasa bado wanatafuta meneja mpya na ni matumaini yao watampata kwa wakati.