STURRIDGE ATEMWA UINGEREZA.

MSHAMBULIAJI wa Liverpool, Daniel Sturridge ameachwa katika kikosi cha timu ya taifa ya Uingereza ambacho kinakabiliwa na mechi za kufuzu michuano ya Ulaya mwakani dhidi ya Estonia na Lithuania. Kiungo wa Tottenham Hotspurs Dele Alli mwenye umri wa miaka 19 na mshambuliaji wa Liverpool Danny Ings mwenye umri wa miaka 23 wameitwa kwa mara ya kwanza katika kikosi cha wakubwa baada ya kuwakilisha katika kikosi cha vijana chini ya umri wa miaka 21. Sturridge ambaye ndio kwanza amepona majeruhi ya paja, alifunga mabao mawili katika ushindi wa mabao 3-2 iliyopata Liverpool dhidi ya Aston Villa Jumamosi iliyopita. Meneja wa Liverpool Brendan Rodgers amesema mshambuliaji huyo hataweza kuhimili mikikimikiki ya mechi zote mbili za Uingereza. Uingereza tayari imeshafuzu michuano hiyo ambayo inatarajiwa kufanyika nchini Ufaransa majira ya kiangazi mwakani.