MATA AMPIGIA CHAPUO COSTA.

KIUNGO wa Manchester United, Juan Mata amemuunga mkono mchezaji mwenzake katika kikosi cha timu ya taifa ya Hispania, Diego Costa kuwa atarejesha kiwango chake katika mchezo wa kirafiki wa kimataifa dhidi ya Uinngereza baadae leo. Costa amekuwa chini ya kiwango toka kuanza kwa msimu huu katika klabu yake ya Chelsea akiwa amefunga mabao matatu katika mechi 17 alizocheza katika mashindano yote. Baadhi ya wadau wamekuwa wakimkosoa Costa kuwa tabia yake ya ubabe imekuwa ikichangia kushuka kwa kiwango chake lakini Mata ana uhakika kuwa nyota huyo mwenye umri wa miaka 27 atarejea katika kiwango chake hivi karibuni. Mata amesema kipindi anachopitia Costa ni cha kawaida kwani wachezaji wengi hupitia huko lakini ana uhakika ataanza tena kufunga mabao kama alivyozoeleka katika klabu na nchi yake.