SZCZESNY KUAMUA HATMA YAKE BAADA YA MICHUANO YA EURO 2016.

GOLIKIPA wa kimataifa wa Poland, Wojciech Szczesny ambaye yuko kwa mkopo AS Roma akitokea Arsenal, amebainisha kuwa taamua mustakabali wake baada ya michuano ya Euro 2016. Nyota huyo aliondoka Arsenal baada ya kuachwa katika kikosi cha kwanza kufuatia kusajiliwa kwa golikipa wa zamani wa Chelsea, Petr Cech. Roma hawana uwezo wa kumchukua golikipa huyo kwa mkataba wa moja kwa moja lakini tayari wameonyesha nia ya kutaka kumbakisha. Akihojiwa Szczesny amesema hadhani kama anaweza kucheza katika klabu nyingine Uingereza kwani anaipenda Arsenal lakini mambo yanamuendea vyema Roma. Golikipa huyo aliendelea kudai kuwa kuondoka Arsenal ilikuwa vigumu lakini alikuwa hataki kuwa kipa namba mbili na hata Arsene Wenger alidhani ni vyema kwake kupata nafasi ya kucheza na anamwamini.