CHELSEA WAJITOSA KUMUWANIA BERAHINO.

KLABU ya Chelsea inajipanga kuwavaa mahasimu wao wa jiji Tottenham Hotspurs kwa kumuwania mshambuliaji wa West Bromwich Albion Saido Berahino. Ofa kadhaa za Spurs kwa Berahino zilikataliwa kiangazi mwaka jana, na kupelekea nyota huyo mwenye umri wa miaka 22 kupeleka maombi yake ya kutaka kuondoka na baadae suala hilo kushindikana. Meneja wa muda wa Chelsea Guus Hiddink amekiri Chelsea inahitaji kuimarisha safu yake ya ushambuliaji kipindi hiki cha usajili wa Januari kutokana na kubakiwa na Diego Costa pekee. Kutokana na nyota huyo wa kimataifa wa Hispania kutokuwa katika kiwango chake bora msimu huu, Chelsea wameripotiwa kuwinda mshambuliaji ambapo mbali na berahino lakini pia wameripotiwa kumuwania Carlos Bacca wa AC Milan. Chelsea pia wameripotiwa kukaribia kukamilisha usajili wa Alex Teixeira kutoka klabu ya Shakhtar Donetsk.