CHELSEA YAMTENGEA BACCA PAUNDI MILIONI 30.

KLABU ya Chelsea, inajipanga kutenga kitita cha paundi milioni 30 kwa ajili ya kumuwania mshambulliaji wa AC Milan Carlos Bacca katika kipindi hiki cha usajili wa Januari. Meneja wa Chelsea Guus Hiddink ameonyesha wasiwasi kutokana na mapungufu yaliyopo katika safu yake ushambuliaji kutokana na Radamel Falcao kujipanga kurejea AS Monaco huku Loic Remy akihusishwa na tetesi za kwenda Aston Villa. Nyota huyo wa kimataifa wa Colombia ambaye alihamia Milan akitokea Sevilla Julai mwaka jana, ameingia katika orodha ya wachezaji wanaowaniwa na Chelsea. Bacca amefunga mabao nane akiwa na Milan na anatarajiwa kuleta ushindani kwa Diego Costa ambaye ameanza kurejea katika kiwango chake chini ya Hiddink.