CITY WAANZA USAJILI KWA KUMSAJILI MAJERUHI GUNDOGAN.

KLABU ya Manchester City imefanikiwa kumsajili rasmi kiungo Ilkay Gundogan kutoka klabu ya Borussia Dortmund kwa mkataba wa miaka minne. Nyota huyo wa kimataifa wa Ujerumani mwenye umri wa miaka 25 kwasasa amefanyiwa upasuaji wa goti lakini hilo halijazuia uhamisho wake huo. City wanadaiwa kufikia makubaliano na Dortmund huku ada ya uhamisho ikiripotiwa kufikia kiasi cha paundi milioni 20. Huo unakuwa usajili wa kwanza kwa City chini ya meneja wake mpya Pep Guardiola aliyechukua nafasi ya Manuel Pellegrini aliyeondoka. Gundogan anatarajiwa kuikosa michuano ya Euro 2016 na mechi za mwanzo za Ligi Kuu msimu ujao kutokana na majeruhi hayo aliyopata Mei akiwa mazoezini lakini City wana imani atapona haraka na kupata nafasi chini ya Guardiola.