GIGGS KUKATAA OFA YA UNITED.

TAARIFA zilizozagaa zinadai kuwa Ryan Giggs anajipanga kumaliza mahusiano ya miaka 29 na klabu ya Manchester United kwa kukataa ofa ya kuwa sehemu ya benchi la ufundi la Jose Mourinho. Mourinho anatarajiwa kuwaleta wasaidizi wake Rui Faria na Silvio Louro katika benchi lake hivyo kuacha kukiwa hakuna nafasi kwa Giggs ambaye alikua akifanya kazi kama msaidizi wa Louis van Gaal. Giggs ambaye amebakisha mkataba wa mwaka mmoja na United kwasasa yuko likizo Dubai akifikiria mustakabali wake na anatarajiwa kukutana na Mourinho hivi karibuni. Taarifa zinadai kuwa United walikuwa wamepanga kumpa ofa Giggs ya kusimamia kikosi cha kwanza na kile cha vijana chini ya miaka 21 lakini mwenyewe sasa anataka kutoka kivyake kama meneja kamili. Giggs alijiunga na United akiwa kijana mdogo mwaka 1987 kabla ya kuibuka katika kikosi cha kwanza Machi mwaka 1991 na kuhitimisha soka lake Mei mwaka 2014 akiwa amefanikiwa kushinda mataji 13 ya Ligi Kuu na mawili ya Ligi ya Mabingwa Ulaya akiwa na United.