BARCELONA YAMREJESHA SUAREZ.

KLABU ya Barcelona imemsajili tena Denis Suarez kutoka Villarreal na kumpa mkataba wa miaka minne. Villarreal walimsajili kiungo huyo wa kushambulia kwa mkataba wa miaka minne Julai mwaka jana baada ya kucheza kwa mkopo wa msimu mmoja Sevilla. Suarez amecheza mechi 48 za mashindano yote na kufunga mabao matano na kusaidia mengine matatu akiwa na Villarreal. Lakini sasa nyota huyo atarejea Camp Nou kufuatia Barcelona kulipa kiasi cha euro milioni 3.25 ikiwa kama sehemu ya makubaliano ya mauzo yaliyofanyika awali. Mkataba mpya wa Suarez unakipengele cha kuongezwa mwaka mmoja zaidi lakini hiyo itategemea na idadi ya mechi atakazocheza katika kipindi hicho cha misimu minne.