MADRID YAKATAA OFA YA EURO MILIONI 80 KWA MORATA.

KLABU ya Real Madrid inadaiwa kukataa ofa ya euro milioni 80 kwa ajili ya Alvaro Morata kabla ya kuamua kumbakisha mshambuliaji huyo Santiago Bernabeu. Morata alikuwa akiwindwa na Chelsea na Arsenal, baada ya Madrid kuamua kumnunua tena kutoka Juventus kwa kitita cha euro milioni 30. Alhamisi iliyopita wakala wa mchezaji huyo alikutana na Madrid na ofa ya paundi milioni 60 ilikataliwa kabla ya kuongezwa na kufikia euro milioni 80 kutoka kwa klabu ambayo haikutajwa jina lake. Mara ya kwanza ilitegemewa kuwa mabingwa hao wa Ulaya wanaweza kumuuza haraka kwa faida nyota huyo mwenye umri wa miaka 23 lakini rais wa klabu hiyo Florentino Perez na Zinedine Zidane wameonekana kubadili mawazo.