USHINDI UNAKUJA PSG - EMERY.

MENEJA wa Paris Saint-Germain-PSG, Unai Emery amedai kuwa kikosi chake kitaanza kupata ushindi karibuni kama wakiendelea kucheza kwa kiwango kama walivyofanya katika sare ya bao 1-1 waliyopata dhidi ya Arsenal katika mchezo wa Ligi ya mabingwa Ulaya jana. Emery ambaye alichukua mikoba ya kuinoa PSG kiangazi hiki, alianza msimu vyema lakini alijikuta akikwama kwa kufungwa na Monaco kwa mabao 3-1 katika mchezo wa Ligue 1 kabla ya kutoa sare na Saint-Etienne na baadae Arsenal hivyo kuwafanya kukosa ushindi katika mechi zao tatu zilizopita. Lakini kutokana na kandanda safi lililoonyeshwa na vijana wa PSG jana, Emery ana uhakika kuwa ushindi uko njiani unakuja. Akihojiwa mara baaa ya mchezo huo, Emery amesema hayakuwa matokeo mazuri lakini amefurahi kwa jinsi walivyocheza vyema kwani wachezaji wake walifanya vile alivyotaka. Emery aliendelea kudai kuw akama wakiendelea kucheza kama hivyo basi hana shaka kuwa ushindi utakuja katika mechi zao za huko mbele.