RONALDO AZINDUA HOTELI YAKE MPYA.

MSHAMBULIAJI nyota wa Real Madrid, Cristiano Ronaldo amesema hoteli yake mpya aliyozindua ni sehemu ya maandalizi yake ya maisha baada ya soka, ingawa mwenyewe amedai anaweza kucheza katika kipindi cha miaka 10 ijayo. Ronaldo alisafiri moja kwa moja kuelekea jijini Lisbon baada ya sare ya bao 1-1 waliyopata Madrid dhidi ya Eibar jana mchana, ambapo jioni ya siku hiyo alifungua rasmi hoteli yake inayoitwa Pestana CR7 Lisboa. Akizunguza katika uzinduzi huo, Ronaldo amesema maisha sio soka peke yake na ingawa ni mchezo anaoupenda lakini lazima afikirikie maisha yake baada ya soka. Hoteli hiyo kubwa ya kifahari itakuwa na vyumba vinavyoanzia bei ya euro 200 mpaka 1,200 kulingana na uwezo wageni watakaokuwa wakimiminika katika hoteli hiyo ya vyumba 82 iliyopo jijini Lisbon. Taarifa zinadai kuwa Ronaldo na mshirika wake Pestana wamewekeza kiasi cha euro milioni 15 katika hoteli huku wakipanga kufungia zingine mbili katika jiji la Madrid na New York.