OZIL AKIRI KUMUOMBA RADHI DAVID LUIZ.

KIUNGO wa kimataifa wa Ujerumani na klabu ya Arsenal, Mesut Ozil amedai alishangazwa kwa kiasi kikubwa na matokeo ya Ujerumani kuibamiza mabao 7-1 Brazil katika michuano ya Kombe la Dunia mwaka 2014 hivyo kumfanya kujisikia vibaya na kwenda kumuomba radhi David Luiz baada ya mchezo. Brazil ilikuwa ikipewa nafasi kubwa wakati wakilekea katika hatua ya nusu fainali ya mchezo huo na walitegemewa kwa kiasi kikubwa kutwaa taji hilo lililokuwa katika ardhi yao. Hata hivyo, hali ilikuwa tofauti kwani dakika 30 za kwanza tayari Ujerumani ilikuwa ikiongoza kwa mabao 4-0 kabla ya kuja kupoteza mchezo kwa kutandikwa jumla ya mabao 7-1. Akihojiwa kuhusiana na hilo, Ozil amesema wachezaji wote kidogo walishangazwa na hali ilivyokuwa akiwemo yeye mwenyewe kwani ulikuwa mchezo mkubwa na hakuna aliyetegemea kwamba wangeweza kuongoza kwa mabao 4-0 baada ya dakika 30. Ozil aliendelea kudai kuwa kwajinsi alivyoona mashabiki wakilia na wachezaji alishindwa kujizuia na kuamua kumfuata David Luiz na kumuomba radhi kwa matokeo waliyopata.