RONALDO AKUTANA NA SHABIKI WAKE ALIYEZINDUKA BAADA YA KUSIKIA BAO LAKE.

MSHAMBULIAJI nyota wa Real Madrid, Cristiano Ronaldo amekutana tena na shabiki wake David Pawlaczyc raia wa Poland katika hoteli waliyofikia jijini Warsaw leo. David aligonga vichwa vya habari mwaka 2014 wakati alipozinduka kutoka katika hali ya kutojitambua baada ya kuwekea rekodi ya Ronaldo akifunga bao masikioni. Chipukizi huyo, ambaye aligongwa na gari wakati akiendesha baiskeli yake Agosti mwaka 2013, alizinduka baada ya wataalamu kupendekeza ichezwe rekodi hiyo wakati Ronaldo akifunga bao la tatu kwa Ureno katika mchezo wa kufuzu Kombe la Dunia dhidi ya Sweden. Baada ya hapo David alialikwa na Ronaldo kwenda kushuhudia mchezo wa Ligi ya Mabingwa Ulaya Santiago Bernabeu mwaka 2014 ambapo aliwekwa upande wa wageni mashuhuri. Mapema leo Madrid walituma picha ya Ronaldo na David sambamba na familia yake ambao wamesafiri kwa saa sita kwenda kuitembelea timu hiyo hotelini jijini Warsaw.