KIUNGO nyota wa zamani wa klabu ya Tottenham Hotspurs na Real Madrid, Rafael van der Vaart ametengana na mkewe Sylvie baada ya nyota huyo kukiri kumpiga. Van der Vaart ambaye kwasasa anacheza katika klabu ya Hamburg ya nchini Ujerumani aliingia katika mzozo na mkewe wakatiwa shereheza kuukaribisha mwaka mpya na inaaminika kuwa alimpiga mbele ya wageni waliokuwepo katika sherehe ndogo waliyoandaa. Kiungo huyo alikiri kosa hilo na kudai kufanya jambo la kijinga na kuomba radhi wakati akihojiwa na gazeti moja nchini Ujerumani huku mke wake nae akidai kumsamehe mumwe huyo kwa kosa alilofanyiwa. Lakini pamoja na mkewe kumsamehe kiungo huyo wawili hao walitangaza kutengana baadae ikiwa ni wiki baada ya kufurahia sherehe za Noel wakiwa pamoja na mtoto wao Damian na kutuma picha ya pamoja katika mtandao wa kijamii wa Twitter.
RAIS wa Shirikisho la Soka nchini Ujerumani-DBF, Wolfgang Niersbach amesema anataka kumaliza haraka suala la mkataba wa kocha wa timu ya taifa ya nchi hiyo Joachim Loew kabla ya michuano ya Kombe la Dunia mwakani itakayofanyika nchini Brazil. Niersbach amesema atakereka kama suala la Loew halitatatuliwa mpaka kuelekea katika michuano hiyo. Loew ambaye aliteuliwa kukinoa kikosi cha nchi hiyo baada ya michuano ya Kombe la Dunia 2006 ana mkataba ambao unamalizika katika michuano ya Kombe la Dunia 2014. Hatahivyo Loew mwenye umri wa miaka 52 ameonyesha hana haraka juu ya mazungumzo ya kuongeza mkataba na kudai kuwa suala muhimu ni kuhakikisha nchi hiyo inafuzu Kombe la Dunia kwanza ndipo waanze mazungumzo.
KLABU ya Tottenham Hotspurs bado haijakuwa na uhakika kama mshambuliaji wake nyota Emmanuel Adebayor ataamua kuungana na timu yake ya taifa ya Togo kwa ajili ya kucheza michuano ya Kombe la Mataifa ya Afrika. Kama nyota huyo mwenye umri wa miaka 28 ataamua kushiriki katika michuano hiyo itakayofanyika nchini Afrika Kusini kuanzia Januari 19 anaweza kukosa michezo mitano ya Ligi Kuu nchini Uingereza. Adebayor aliisaidia Spurs kupata ushindi wa mabao 3-1 katika mchezo dhidi ya Reading uliofanyika jana na kuondoka kwake itakuwa pigo kubwa kwa klabu hiyo. Lakini meneja wa Spurs, Andre Villas-Boas amesema kuwa kamanyota huyo ataamua kuondoka kujiunga na nchi yake wataheshimu uamuzi wake. Adebayor alisusia michezo ya kimataifa kulishinikiza Shirikisho la Soka nchini Togo kutoa marupurupu ambayo wamekuwa wakicheleweshewa katika mechi kadhaa zilizopita.
NAHODHA wa klabu ya Real Madrid, Iker Casillas amesisitiza kuwa ameongeza muda wa kujifua mazoezini ili aweze`kupata namba tena katika kikosi cha kwanza cha timu hiyo. Casillas mwenye umri wa miaka 31 alienguliwa katika kikosi cha kwanza wakati Madrid ilipokubali kipigo cha mabao 3-2 dhidi ya Malaga na kocha wake Jose Mourinho na nafasi yake kuchukuliwa na golikipa namba mbili Antonio Adan. Hatahivyo akiongea na waandishi wa habari baada ya mazoezi ya kwanza ya Madrid baada ya mapumziko ya kipindi cha baridi, golikipa huyo amesema anajitahidi kufanya kila awezalo ili aweze kupigania namba yake katika kikosi cha kwanza. Casillas amesema kocha ndio mwenye maamuzi ya kuamua nani acheze na asicheze katika mchezo unaofuata na wote wanamuunga mkono Mourinho na wana imani naye kwa maamuzi atakayochukua. Madrid kwasasa iko katika nafasi ya tatu katika msimamo wa La Liga kwa tofauti ya alama 16 na mahasimu wao Barcelona ambao wanaongoza msimamo wa ligi hiyo.
MENEJA wa klabu ya Arsenal, Arsene Wenger ameondoa uwezekano wa kumsajili tena kwa mkopo mshambuliaji nyota wa zamani wa klabu hiyo Thierry Henry. Henry mwenye umri wa miaka 35 amekuwa akifanya mazoezi na klabu hiyo ili kujiweka katika hali nzuri kufuatia kumalizika kwa msimu wa Ligi Kuu nchini Marekani-MLS akiwa na na timu ya New York Red Bulls. Wenger amesema nyota huyo hayuko fiti kwasababu ndio kwanza amerejea kutoka mapumzikoni hivyo kwasasa suala la kumsajili halipo. Henry alirejea katika klabu yake hiyo ya zamani mwaka 2011 baada ya kuondoka mwaka 2007 na kujiunga na Barcelona na kufunga bao pekee katika mchezo wa Kombe la FA dhidi ya Leeds United.
