RODRIGUEZ ADAI HAENDI POPOTE.

KIUNGO mahiri wa kimataifa wa Colombia, James Rodriguez amemaliza uvumi ulioenea kuhusu kuondoka Real Madrid kwa kithibitisha kuwa ataendelea kubakia katika klabu hiyo na kupigania nafasi yake.
Tetesi hizo za kuondoka kwa nyota huyo zilizivuta klabu za Chelsea, Paris Saint-Germain na Manchester United kuanza kumnyemelea.
Mwezi uliopita Rodriguez aliongeza uvumi huo baada ya kusai kuwa amepata ofa ya kuondoka na hakuthibitisha kama ataendelea kubakia Santiago Bernabeu.
Lakini baada ya kufunga mabao mawili katika ushindi wa mabao 3-0 dhidi ya Sevilla jana katika mchezo wa Kombe la Mfalme, nyota huyo sasa ameamua kubakia klabu hapo baada ya kufanya mazungumzo na meneja wake Zinedine Zidane.

TUZO ZA CAF KUTOLEWA LEO.

SHIRIKISHO la Soka la Afrika-CAF kesho linatarajia kufanya sherehe ya kutoa tuzo kwa wachezaji mbalimbali wa soka waliofanya vizuri katika kipindi cha mwaka mzima uliopita. Sherehe hizo zinakuwa ni za 25 toka kuanzishwa kwake na zinatarajiwa kufanyika jijini Abuja, Nigeria kwa mara ya pili mfululizo. Kwenye sherehe hizo atapatikana mfalme wa soka Afrika ambapo miongoni mwao ni pamoja na mshindi wa tuzo ya mwaka jana Pierre-Emerick Aubameyang wa Gabon, Riyad Mahrez wa Algeria na Sadio Mane anayetoka Senegal. Kuanzia mwaka 1992 zilipoanzishwa tuzo hizo ambapo ilikwenda kwa nguli wa zamani wa Ghana Abeid Ayew Pele mpaka mwaka jana alipotwaa Aubameyang ni jumla ya wachezaji 15 waliofanikiwa kutwaa hiyo. Nyota wa Cameroon Samuel Eto’o ndio mchezaji wa kwanza kutwaa tuzo hiyo mara nne mfululizo mwaka 2003, 2004, 2005 na 2010 kabla ya Yaya Toure wa Ivory Coast hajaivunja rekodi hiyo kwa kutwaa kuanzia mwaka 2011 mpaka 2014.

HULL CITY YAMTIMUA MENEJA WAKE.

KLABU ya Hull City imeamua kumtimua meneja wake Mike Phelan kufuatia kuendelea kuvurunda kwa timu hiyo katika Ligi Kuu. Phelan mwenye umri wa miaka 54 alichukua mikoba kama kocha wa muda kufuatia kuondoka kwa Steve Bruce majira ya kiangazi na kufanikiwa kuteuliwa kuchukua nafasi hiyo moja kwa moja Octoba mwaka jana. Lakini kufuatia Hull City kuburuza mkia katika msimamo wa ligi huku wakiwa wameambulia alama tatu pekee katika mechi tisa za mwisho, klabu imeamua kuachana na kocha huyo. Katika taarifa yake klabu hiyo imedai kuwa kwasasa wanatafuta mbadala wa Phelan na watamtangaza hivi karibuni.

CONTE AWAPASHA WANAOSEMA TIMU YAKE INAPENDELEWA.

MENEJA wa Chelsea, Antonio Conte amedai kuwa ratiba yao ya msimu wa sikukuu inakosolewa kwasababu wako kileleni mwa msimamo wa Ligi Kuu. Chelsea wana nafasi kubwa ya mapumziko katika ratiba yao kuliko timu yeyote kwenye kipindi hiki huku meneja wa Manchester United Jose Mourinho naye akitoa kauli kuhusiana na faida inayopata klabu yake hiyo ya zamani. Chelsea wameshinda mechi 13 mfululizo katika ligi na wanaweza kufikia rekodi iliyowekwa na Arsenal mwaka 2002 kama wakifanikiwa kuichapa Tottenham Hotspurs baadae leo. Akihojiwa kuhusiana na suala hilo Conte alikiri kuwa ni kweli wana faida kidogo kwani wamepata muda wa kupumzika siku moja zaidi ya wapinzani wao Spurs lakini sio wao waliopanga ratiba. Conte aliendelea kudai kuwa anadhani malalamiko yamekuwa makubwa zaidi kwao kwasababu wanaongoza msimamo wa ligi.

WACHEZAJI WANGU WALIGOMBA KUFUNGWA - WENGER.

MENEJA wa Arsenal, Arsene Wenger amesema kikosi chake kiligoma kupoteza mchezo kufuatia kutoka nyuma wakiwa wamefungwa mabao 3-0 na kutoa sare ya mabao 3-3 dhidi ya Bournemouth. Hiyo ni mara ya kwanza kwa Arsenal kufanikiwa kupata alama baada ya kufungwa mabao matatu katika mchezo wa Ligi Kuu. Akihojiwa Wenger amesema mchezo huo ulikuwa ni jaribio tosha la kimwili na kiakili, lakini mwishoni wamehuzunishwa kwa kutoshinda. Wenger aliendelea kudai kuwa walihitaji kushinda mchezo huo lakini haikuwa rahisi kwani timu kubwa zingine nazo zilipoteza mechi zao kwa Bournemouth ikiwemo Liverpool.

CHAPECOENSE KUSAJILI 20 WAPYA KWA AJILI YA MSIMU MPYA.

MKURUGENZI wa michezo wa Chapecoense, Rui Costa amedai kuwa klabu hiyo inatarajia kusaini wachezaji wapya 20 kwa ajili ya msimu mpya huku fulana mbili za wachezaji walionusurika katika ajali zikituzwa bila kwa matumaini kuwa wanaweza kurejea uwanjani tena. Klabu hiyo ilipoteza karibu wachezaji wote waliofariki katika ajali ya ndege nchini Colombia Novemba 28 mwaka huu. Klabu hiyo ndogo inayotoka kusini wa Brazil ilikuwa njiani kuelekea Medelin kucheza na Atletico Nacional katika mchezo wa fainali ya Copa Sudamericana kabla ya kupata ajali hiyo milimani na kuua watu 71. Mabeki Neto na Alan Ruschel walisalimika katika ajali hiyo sambamba na kipa wa akiba Jackson Follmann ambaye mguu wake umekatwa kutokana na ajali hiyo. Costa amesema wachezaji wote watatu waliopona ajalini bado wana nafasi ya kucheza na hakuna mchezaji yeyote atakayevaa jezi zao na pamoja na kwamba Follmann hataweza lakini anaweza kushiriki kwa upande mwingine. Costa aliendelea kudai kuwa klabu hiyo itasajili wachezaji 18 mpaka 20 wapya kabla ya kuanza kwa msimu Januari 26 kwa mchezo wa nyumbani dhidi ya Joinville.

WENGER ALISIFIA BAO LA GIROUD.

MENEJA wa Arsenal, Arsene Wenger amedai kuwa bao murua la Olivier Giroud alilofunga katika ushindi wa mabao 2-0 waliopata dhidi ya Crystal Palace ni moja kati ya mabao yake tano bora aliyopata kushuhudia katika kipindi cha miaka 21 akiwa na klabu hiyo.
Mabao ya kina Thierry Henry na Dennis Bergkamp nayo yapo katika orodha yake lakini amesema bao hilo la jana milele litakuwa la Giroud pekee.
Wenger amesema kiufundi sio jambo lisilowezekana lakini unatakiwa na uwezo tofauti kwani mpira wa krosi haukuja kama ilivyotakiwa na Giroud alifanya jambo la kipekee.
Nyota huyo wa kimataifa wa Ufaransa amesema ilikuwa kama bahati kwani mpira haukuja kama ilivyotakiwa.