KLABU ya Chelsea na Shanghai SIPG zimekubaliana uhamisho wa kiungo Oscar kwenda Ligi Kuu ya China katika kipindi cha usajili wa majira ya kiangazi Januari mwakani. Nyota huyo wa kimataifa wa Brazil mwenye umri wa miaka 25 mapema mwezi huu alibainisha kuwa uhamisho wake ulikuwa umekamilika kwa asilimia 90. Oscar alijiunga na Chelsea akitokea Internacional kwa kitita cha paundi milioni 25 mwaka 2012 na kufunga mabao 38 katika mechi 203 alizoichezea klabu hiyo. Katika taarifa yake ilitolewa mapema leo Chelsea walithibitisha taarifa hizo kuwa kiungo huyo atakwenda nchini China Januari mwakani. Oscar ambaye amekuwa akihangaika kupata nafasi chini ya meneja mpya Antonio Conte, anakwenda Shanghai kujiunga na meneja wa zamani wa Chelsea Andre Villas-Boas.
BEKI wa Liverpool Joel Matip ni mmoja kati ya wachezaji saba ambao wamesema hawataki kwenda kushiriki michuano ya Mataifa ya Afrika ambayo inatarajiwa kuanza kutimua vumbi Januari 14 mwakani. Kwa mujibu ya taarifa iliyotolewa na Shirikisho la Soka la nchi hiyo-FECAFOOT imedai kuwa beki huyo ametoa kauli hiyo kupitia uzoefu wake aliopata katika benchi la ufundi lililopita. Beki wa West Browich Albion, Allan Nyom ni miongoni mwa orodha ya wachezaji saba waliogoma. FECAFOOT inaweza kuliagiza Shirikisho la Soka Duniani-FIFA kuwasimamisha wachezaji hao kuzitumikia klabu zao kwa kipindi cha wiki tatu michuano hiyo itakapokuwa ikiendelea. Kocha wa Cameroon, Hugo Broos amesema wachezaji hao waliogoma wameweka maslahi yao mbele kuliko yale ya timu ya taifa na shirikisho lina haki ya kuwachukulia hatua kwa mujibu wa sheria za FIFA. WEngine waliopo katika mgomo huo ni pamoja na Andre Onana wa Ajax Amsterdam, Guy N’dy Assembe wa Nancy, Maxime Poundeje wa Bordeaux, Andre-Frank Zambo Anguissa wa Marseille na Ibrahim Amadou wa Lille. Cameroon imepangwa kundi A sambamba na wenyeji Gabon, Burkina Faso na Guinea Bissau.
KLABU ya Manchester United inadaiwa kujipanga kumpa ofa ya kumuongeza mkataba meneja wake Jose Mourinho nyuma ya mkataba wake wa sasa wa miaka mitatu. Wamiliki wa United wanadaiwa kuridhishwa na kazi aliyofanya Mourinho toka alipotua Old Trafford ana wanaamini anaweza kufanikisha wakatwaa taji la 21 la Ligi Kuu kwa klabu hiyo. Pamoja na United kuanza msimu kwa kusuasua lakini meneja huyo amefanikiwa kuirejeshea makali yake kwa kushinda mechi tatu mfululizo ambazo kwa kiasi kikubwa zimewasaidia kupunguza pengo la alama baina yake na timu zilizokuwa katika orodha nne za juu. Inafahamika kuwa mustakabali wa Mourinho mwenye umri wa miaka 53 unategemea matokeo na aina ya uchezaji lakini familia ya Glazers imeonyesha kufurahishwa na anachokifanya meneja huyo mpaka sasa.
KLABU ya Arsenal inadaiwa kujipanga kumuwania beki wa kushoto wa Valencia, Jose Gaya. Gaya anaonekana kama mmoja ya wachezaji wanaoibuka kwa kasi Ulaya na kuna kila dalili kuwa Valencia hataweza kumzuia chipukizi huyo mwenye umri wa miaka 21 kuondoka. Manchester United na Chelsea nazo pia zimetajwa kumuwania chipukizi huyo lakini Arsenal ndio wanaoonekana kumuhitaji zaidi ili kuimarisha eneo lao la ulinzi la kushoto. Katika taarifa nyingine kutoka ndani ya klabu hiyo imedaiowa kuwa Wenger ameonyesha dalili kuwa ataendelea kuinoa klabu hiyo kupita mkataba wake wa sasa.
KLABU ya West Ham United inadaiwa kujiandaa kuwawania kwa mkopo nyota wa Manchester United Marcus Rashford na Anthony Martial katika kipindi cha usajili wa dirisha dogo. West Hama kwasasa wako juu kidogo la eneo la kushuka la kushuka daraja katika msimamo wa Ligi Kuu na wanataka kuongeza nguvu katika safu yao ya ushambuliaji na washambuliaji hao wa United wanaweza kuleta tofauti ili waweze kuepuka kushuka daraja. Mshambuliaji wa Chelsea Michy Batshuayi ndio alikuwa chaguo namba moja la West Ham lakini meneja Slaven Bilic ameamua kuangalia uwezekano mwingine kwasababu Chelsea inaweza ikashindwa kumruhusu kuondoka januari. Kutokana na Rashford na Martial kupoteza nafasi zao katika kikosi cha kwanza United msimu huu, West Ham wana matumaini kuwa wakiwaahidi muda zaidi wa kucheza inaweza kuwarahisishia kuwapata.
MSHAMBULIAJI wa Leicester City, Jamie Vardy anatarajiwa kukosa mechi tatu baada ya rufani yake kupinga kadi nyekundu aliyopewa Jumamosi iliyopita katika mchezo dhidi ya Stoke City kukataliwa. Chama cha Soka cha Uingereza-FA kilitupilia mbali rufani hiyo, hivyo sasa Vardy anatarajiwa kukosa mechi dhidi ya Everton, West Ham United na Middlesbrough. Nyota huyo wa kimataifa wa Uingereza alitolewa nje na mwamuzi Graig Pawson katika dakika ya 28 kwa kumkwatua Mame Diouf wa Stoke. Baada ya mchezo huo meneja wa Leicester Claudio Ranieri alimtetea Vardy akidai alikuwa amefuata mpira na sio kucheza rafu hivyo alidhani pengine mwamuzi angempa kadi ya njano badala ya nyekundu kama alivyofanya. Baada ya kukosa mechi zote za msimu wa sikukuu, Vardy anatarajiwa kurejea uwanjani Januari 7 mwakani wakati Leicester itakapochuana na Everton tena katika mzunguko wa tatu wa michuano ya Kombe la FA.
MSHAMBULIAJI wa Liverpool, Sadio Mane ana uhakika klabu hiyo inaweza kuendelea vyema bila uwepo wake wakati atakapoondoka kwa ajili ya michuano ya Mataifa ya Afrika mwezi ujao. Mane ambaye anaongoza orodha ya wafungaji katika klabu hiyo akiwa na mabao nane amebakisha mechi tatu pekee za Ligi Kuu dhidi ya Stoke City, Manchester City na Sunderland kabla ya hajakwenda kujiunga na timu yake ya taifa ya Senegal. Nyota huyo anatarajiwa kuwa na Senegal mpaka hatua ya mwisho ambayo nchi hiyo itafikia kabla ya kurejea tena Uingereza kuitumikia Liverpool. Akihojiwa Mane amesema sio jambo rahisi kuondoka na kuwaacha wachezaji wenzake wa Liverpool wakipigana peke yao lakini hana jinsi kwani lazima akalitumikie taifa lake kwani ni moja ya ndoto zake pia. Mane aliendelea kudai kuwa anaamini kikosi chao kiko vizuri na wanaweza kuendelea vyema hata bila uwepo wake.
