MSHAMBULIAJI nyota wa kimataifa wa Ureno na Real Madrid, Cristiano Ronaldo amesema alishangazwa wakati Sir Alex Ferguson alipomwambia avae jezi namba saba akiwa Manchester United, akifuata nyayo za manguli kama kina George Best, Eric Cantona na David Beckham. Akizungumza na wanahabari, Ronaldo amesema wakati ametua United alikuwa amepanga kuvaa jezi namba 28 lakini Ferguson alimwambia angependa avae namba saba. Ronaldo aliendelea kudai kuwa jambo hilo lilimshangaza kwasababu alikuwa anafahamu wachezaji wakubwa waliowahi kuvaa jezi yenye namba hiyo. Ronaldo ambaye alikuwa na umri wa miaka 18 pekee wakati akitua Old Trafford akitokea Sporting Lisbon mwaka 2003, alikwenda kushinda mataji matatu ya Ligi Kuu na moja la Ligi ya Mabingwa Ulaya. Pia Ronaldo alipata tuzo yake ya kwanza ya Ballon d’Or akiwa United kabla ya kuhamia Madrid mwaka 2009 kwa kitita cha euro milioni 94.
MENEJA wa Arsenal, Arsene Wenger amesema kusuasua kwa kikosi chake msimu huu kunaonyesha kwamba kumaliza kwenye nafasi nne za juu katika Ligi Kuu sio jambo rahisi kama inavyofikiriwa. Meneja huyo raia wa Ufaransa ameiongoza Arsenal kumaliza kwenye nafasi nne na kufuzu michuano ya Ligi ya Mabingwa Ulaya kwa kipindi cha miaka 20 iliyopita. Lakini huku kukiwa kumebaki mechi 10, Arsenal kwasasa wanashikilia nafasi ya sita, alama saba nyuma ya kufikia nafasi ya nne. Akizungumza na wanahabari, Wenger amesema kumaliza kwenye nafasi nne itakuwa changamoto nzuri lakini anafikiri ni jambo linalowezekana. Wenger aliendelea kudai kuwa wamekuw wakifanya hivyo kwa miaka 20 na ilionekana kama sio kitu lakini amefurahi kuona watu wakigundua kuwa sio rahisi kama inavyofikiriwa.
MSHAMBULIAJI wa zamani wa kimataifa wa Nigeria, Peter Odemwingie angependa kurejesha makali nchini Indonesia kwa kufunga mabao muhimu baada ya kusajiliwa na klabu ya Madura United. Mkongwe huyo mwenye umri wa miaka 35 ambaye aliiwakilisha Nigeria katika michuano ya Kombe la Dunia ya mwaka 2010 na 2014, amesaini mkataba wa mwaka mmoja na klabu hiyo huku kukiwa na kipengele cha kuongezewa mwingine. Odemwingie amekuwa bila klabu toka alipoondoka Rothertham Januari mwaka huu. Akizungumza na BBC Odemwingie anafurahi kuwa sehemu ya kipindi kizuri cha mapinduzi ya soka la Indonesia. Odemwingie aliendelea kudai kuwa ana matumaini makubwa ya kurejesha kiwango chake kwa kuifungia Madura mabao muhimu. Odemwingie amekuwa mchezaji wa tatu aliyewahi kuichezea Ligi Kuu ya Uingereza kwenda Indonesia baada ya Michael Essien na Carlton Cole.
MSHAMBULIAJI wa Manchester United, Zlatan Ibrahimovic amefurahi kurejea kwenye kikosi cha timu hio baada ya kumaliza adhabu yake kufungiwa mechi tatu za Ligi Kuu ya Uingereza. Nyota huyo wa kimataifa wa Sweden alilazimika kuwa mtazamaji kwa wiki kadhaa baada ya kulimwa adhabu hiyo na Chama cha Soka cha Uingereza-FA kwa kumpiga kiwiko beki wa Bournemouth Tyrone Mings katika sare ya bao 1-1 Machi 4 mwaka huu. Kutokuwepo kwake kumeshuhudia United wakitolewa kwenye michuano ya Kombe la FA dhidi ya Chelsea na kupoteza alama mbili kwenye mchezo wa Ligi Kuu dhidi ya West Bromwich Albion mwishoni mwa wiki iliyopita. Akizungumza na wanahabari, Ibrahimovic amesema kukosekana kwake uwanjani ni sehemu ya mchezo kwani siku zote mchezaji hawezi kucheza kwasababu kuna muda unaweza kuumia au kutumikia adhabu kama yeye. Ibrahimovic aliendelea kudai kuwa anajisikia vyema na ana hamu kubwa ya kurejea uwanjani huku akiwa na matumaini ya kuendelea kuisaidia timu yake kwa kufunga mabao.
MENEJA wa Manchester City, Pep Guardiola amesema hafahamu jinsi gani suala la kujitoa kwa Uingereza kwenye Umoja wa Ulaya likavyokuwa lakini ameongeza kama hawatahitaji wageni wataondoka. Waziri Mkuu wa Uingereza, Theresa may ameanza kuchukua hatua za kujitoa kwneye umoja huo mapema wiki hii na sasa watakuwa na miaka miwili ya kujadili jinsi ya kuondoka kwao. Moja ya mambo yatakayojadiliwa mpaka ifikapo mwaka 2019 ni pamoja na haki za raia wa EU wanaoishi Uingereza pamoja na raia wa Uingereza wanaoishi EU. Akiulizwa kuhusiana na suala hilo, Guardiola amesema anadhani hata Waingereza wenyewe wanasubiria kuona jinsi itakavyokuwa baada ya kujitoa. Guardiola aliendelea kudai kuwa jambo muhimu ni kusubiri ba kuona itakavyokuwa na kama wageni watalazimika kuondoka badi watafanya hivyo.
KLABU ya West Ham United inadaiwa kumuwania mshambuliaji wa Arsenal Lucas Perez ambaye anadaiwa kutokuwa na furaha kwenye klabu hiyo. West Ham tayari wamshaweka mipango ya kumuwania Perez ambaye amepanga kuondoka Emirates majira ya kiangazi baada ya kushindwa kung’aa katika msimu wake wa kwanza Arsenal. Perez mwenye umri wa miaka 28 alijiunga na Arsenal Agosti mwaka jana kwa kitita cha paundi milioni 17 kutoka Deportivo La Coruna lakini ameshindwa kupata namba ya kudumu kwneye kikosi hicho hivyo anataka kuondoka. West Ham wana matumaini kumpata mshambuliaji huyo kwa kiasi kama alichonunuliwa na Arsenal na inadaiwa tayri wawakilishi wa pande zote mbili wameshaanza mazungumzo.
KIUNGO wa Manchester United, Juan Mata anatarajiwa kukaa nje kwa wiki kadhaa baada ya kufanyiwa upasuaji wa mtoki Alhamisi iliyopita. Nyota huyo wa kimataifa wa Hispania anatarajiwa kukosa mechi tatu za Ligi Kuu za United wiki hii na kuna hatihati ya kukosa mchezo wa mkondo wa kwanza wa michuano ya Europa League dhidi ya Anderlecht. Kuanzia wiki ijayo atafanyiwa vipimo zaidi, ingawa Mata mwenyewe ana uhakika wa kurejea uwanjani kabla ya kumalizika kwa msimu huu. Majeruhi yameathiri safu ya kiungo ya United kufuatia Paul Pogba na kuwa majeruhi wakati Ander Herrera na mashabuliaji Zlatan Ibrahimovic wakitumikia adhabu.
