WAKALA wa Marco Verratti ametaka kuitishwa kwa mazungumzo na Paris Saint-Germain juu ya mustakabali wa kiungo huyo baada ya fainali ya Coupe de France. Nyota huyo wa kimataifa wa Italia ameendelea kuhusishwa na tetesi za kwenda Barcelona mwishoni mwa msimu huu kufuatia kutofanya vyema sana chini ya meneja Unai Emery. PSG tayari wameshashinda mataji mawili msimu huu lakini walitolewa na Barcelona katika michuano ya Ligi ya Mabingwa Ulaya na pia kuna dalili za kupoteza taji la Ligue 1 kwa Monaco. Wakala wa Verratti, Donato Di Campli, hataki kuharakisha sana mazungumzo lakini ameweka wazi anataka kuzungumza na klabu hiyo baada ya fainali ya Coupe de France ambapo PSG watacheza dhidi ya Angers Mei 27.
MENEJA wa Liverpool, Jurgen Klopp amewataka wachezaji wake kuendelea kujituma zaidi baada ya kurejesha matumaini ya kumaliza katika nafasi nne za juu katika msimamo wa Ligi Kuu kufuatia ushindi dhidi ya Watford. Bao pekee lililofungwa na Emre Can lilitosha kuwapa ushindi wa Liverpool na kuwafanya kuendelea kubaki katika nafasi ya tatu katika msimamo wa ligi wakiwazidi Manchester City kwa alama tatu. Ushindi katika mechi tatu zijazo za Liverpool dhidi ya Southampton, West Ham United na Middlesbrough utakuwa umewahakikishia nafasi ya kushiriki michuano ya Ligi ya Mabingwa ulaya msimu ujao. Hata hivyo, Klopp amedai bado kuna kazi kubwa ta kufanya kuhakikisha wanaendeleza umakini katika mechi zao zilizosalia.
WAKALA wa mchezaji wa Manchester United Zlatan Ibrahimovic, Mino Raiola, amesema mshambuliaji huyo amefanyiwa upasuaji kwenye goti lake na kwamba umekuwa na mafanikio. Nyota huyo wa kimataifa wa Sweden mwenye umri wa miaka 35 aliumia kwenye kano za goti wakati wa mechi ya Europa League dhidi ya Anderlecht Aprili 20. Lakini Raiola amesema kwenye taarifa kwamba jeraha alilopata mchezaji huyo halitishii uchezaji wake. Ibrahimovic anakaribia kumaliza mkataba wake wa mwaka mmoja Old Trafford, na bado hajaafikiana na klabu hiyo kuhusu mkataba mpya. Mkongwe huyo amefunga mabao 28 msimu huu, baada ya kujiunga na United bila kulipiwa ada yoyote kutoka Paris Saint-Germain majira ya joto mwaka jana.
MAN UTD INAMTAKA BELOTTI
KLABU ya Manchester United inadaiwa kutaka kumuania mshambuliaji wa Torino, Andrea Belotti. United imekuwa ikihusishwa na taarifa za kutaka mshambuliaji mwenye jina kubwa kwa ajili ya msimu ujao, huku Antoine Griezmann akiongoza kwenye listi yao. United walio chini ya Jose Mourinho wanadaiwa kuwasiliana na klabu hiyo ya Serie A ili kuonyesha kuwa wanamfuatilia mashambuliaji huyo ambaye pia amekuwa akihusishwa na tetesi za kuwaniwa na Arsenal.
Source: ESPN
BARCA WAANZA MAZUNGUMZO YA BELLERIN
KLABU ya Barcelona inadaiwa kujiandaa rasmi kwa ajili ya kumsajili Hector Bellerin kutoka Arsenal. Barcelona wamemfanya beki huyo wa upande wa kulia kuwa chaguo lao namba moja katika usajili ujao wa kiangazi, huku klabu hiyo ikiunga mkono mipango ya katibu wa ufundi David Fernandez ya kujaribu kumrejesha nyota huyo Camp Nou. Hata hivyo, nyongeza ya mkataba mpya aliyopewa nyota huyo wa kimataifa wa Hispania mwenye umri wa miaka 22 inamaanisha Barcelona watalazimika kutoka dau kubwa zaidi ili kuishawishi Arsenal kuamuachia.
Source: Mundo Deportivo
CHELSEA YAKARIBIA KUMNASA VAN DIJK
KLABU ya Chelsea inaamini ndio wanaongoza mbio za kumuwania kumsajili kiungo Virgil van Dijk mwenye umri wa miaka 25 kutoka Southmpton. Nyota huyo wa kimataifa wa Uholanzi amekuwa akiwaniwa na karibu kila klabu kubwa katika Ligi Kuu mwaka huu, lakini Chelsea wamedai kuwa ofa yao ya kumtoa beki wa kati Andreas Christensen ambaye yuko kwa mkopo Borussia Moenchengladbach kwenda Southampton itarahisisha dili lao.
Source: The Sun
ARSENAL KUONGEZA MKURUGENZI WA MICHEZOMKURUGENZI wa michezo wa klabu ya Hoffenheim, Alexander Rosen anadaiwa kuongezwa katika orodha ya watu wanaoweza kuchukua nafasi hiyo mpya kwa klabu ya Arsenal. Mbali na Rosen wapo Marc Overmars na mkurugenzi wa michezo wa Borussia Dortmund Michael Zorc ambao nao pia wanafikiriwa kwneye nafasi hiyo.
Source: Mirror
OZIL ANATAKA PAUNDI 300,000 KWA WIKI
KLABU ya Arsenal inadaiwa bado inasita kuimarisha ofa ya mkataba mpya wa Mesut Ozil kutokana na wasiwasi juu ya kujitoa kwa klabu kwa nyota huyo wa kimataifa wa Ujerumani. Taarifa zinadai kiungo huyo ambaye amekuwa akisuasua kiwango chake hivi karibuni amekataa kusaini ofa ya paundi 250,000 kwa wiki na badala yake anataka paundi 300,000 kwa wiki.
Source: Daily Mail
UNITED YAONGOZA MBIO ZA KUMSAJILI SCHMEICHEL
KLABU ya Manchester United inadaiwa kuwazidi majirani zao Man City katika mbio za kumsajili kipa wa Leicester City Kasper Schmeichel. Kipa huyo mwenye umri wa miaka 30, mtoto wa nguli wa zamani wa United Peter ndio anatajwa kuwa chaguo namba moja la kuziba nafasi ya David de Gea ambaye anategemewa kujiunga na Real Madrid majira ya kiangazi.
Source: Sky Sports
KLABU ya Manchester United inatarajiwa kwenda katika mchezo wao wa mkono wa kwanza wa nusu fainali ya Europa League Alhamisi hii bila nyota wake saba wa kikosi cha kwanza. Meneja wa United, Jose Mourinho alishuhudia orodha ya majeruhi katika kikosi chake ikiongezeka jana kufuatia sare ya bao 1-1 waliyopata nyumbani dhidi ya Swansea City ambapo mabeki wake Luke Shaw na Eric Bailly walitolewa nje. Kukosekana kwa Bailly kunamaanisha kuwa Mourinho hatakuwa na beki wa kati anayejulikana kufuatia Chris Smalling na Phil Jones na pia kuwa majeruhi. Lakini kiungo Juan Mata alirejea katika benchi la United kwenye mchezo huo dhidi ya Swansea baada ya kukosa mechi nane kutokana na matatizo ya nyonga. Paul Pogba naye pia anatarajiwa kurejea katika mchezo huo utakaofanyika nchini Hispania baada ya kukosa mechi mbili lakini Zlatan Ibrahimovic, marcos Rojo na Tomothy Fosu-Mensah hawatakuwepo.
MENEJA wa Arsenal, Arsene Wenger amewapongeza Tottenham Hotspurs baada ya kushinda mchezo wao wa derby ya kaskazini mwa London katika Uwanja wa White Hart Lane kwa mabao 2-0 na kuwahakikishia nafasi ya kumaliza juu ya mahasimu wao hao kwa mara ya kwanza toka mwaka 1995. Mabao ya Delle Alli na Harry Kane aliyefunga kwa penati yalitosha kuwahakikishia ushindi Spurs huku nafasi ya Arsenal kumaliza kwenye nafasi nne za juu ikiwa mashakani. Akizungumza na wanahabari kuhusiana na suala hilo, Wenger aliwapongeza Spurs lakini aliongeza kuwa wakati wanaanza msimu malengo makubwa sio kumaliza juu ya mahasimu wao bal ni kushinda taji la ligi. Wenger aliendelea kudai kuwa wanasikitika kwa kuwa hawapo katika mbio za ubingwa haswa katika kipindi hiki wakati wa ligi ikielekea mwishoni.
KLABU ya Inter Milan inadaiwa kuandaa mkutano na kocha wa Atletico Madrid Diego Simeone ambapo watampa ofa rasmi na kujiunga na wakongwe hao wa soka la Italia. Mkutano huo unatarajiwa kufanyika baada ya mechi ya mkondo wa pili ya nusu fainali ya michuano ya Ligi ya Mabingwa dhidi ya mahasimu wao Real Madrid. Inter inatarajia kumpa ofa Simeone ya mkataba wa miaka mitatu wenye thamani ya euro milioni 6 kila msimu. Mkataba wa sasa wa Simone katika klabu hiyo unamalizika mwaka 2018 na bado hajazungumzia kuhusu kuongeza mwingine.
