MENEJA wa Everton, Ronald Koeman amedai kuwa bado ana ndoto za kuja kuinoa Barcelona siku za usoni. Hata hivyo, beki huyo wa zamani ambaye alicheza kwa kipindi cha miaka sita Barcelona kuanzia mwaka 1989 mpaka 1995, amesema kwasasa anataka nguvu amezielekeza kwa Everton ili waweze kufuzu michuano ya Ligi ya Mabingwa Ulaya. Koeman mwenye umri wa miaka 54 yuko katika msimu wake wa kwanza kati ya mitatu aliyosaini kwenye mkataba wake kiangazi mwaka jana akitokea Southampton. Meneja huyo amekuwa akihusishwa na tetesi za kurejea Camp Nou baada ya Lus Enrique kuweka wazi kuwa atajiuzulu nafasi yake hiyo mwishoni mwa msimu huu. Akizungumza na wanahabari kuhusiana na suala hilo, Koeman raia wa Uholanzi amesema anafurahi kuona watu wakimfikiria kwani wote wanafahamu kuwa yeye ni Barcelona. Koeman aliendelea kudai kuwa katika maisha yake ana ndoto mbili za kutimiza mojawapo ni kuinoa timu ya taifa ya nchi yake nafasi ambayo ameikosa kutokana na majukumu aliyonayo Everton na lingine ya kuinoa Barcelona siku zijazo.
MSHAMBULIAJI nyota wa Real Madrid, Cristiano Ronaldo ameendelea kung’ara ndani na nje ya uwanja kutokana na umahiri wake mkubwa katika soka. Juzi nyota huyo shindig wa tuzo ya Ballon d’Or aliisaidia Madrid kupiga hatua moja kuelekea fainali ya Ligi ya Mabingwa Ulaya kwa kufunga hat-trick katika ushindi wa mabao 3-0 waliopata dhidi ya Atletico Madrid katika Uwanja wa Santiago Bernabeu. Nyota huyo hakuishia hapo kwani ameendelea kuweka historia hata nje ya uwanja kwa kuwa mwanamichezo wa kwanza kufikisha mashabiki milioni 100 wanaomfuatilia katika mtandao wake wa kijamii wa Instagram. Ronaldo amewaacha mbali wanamichezo wengine akiwemo hasimu wake wa karibu Lionel Messi wa Barcelona ambaye yeye anafuatiliwa na watu milioni 70.8 katika mtandao huo. Wachezaji soka ndio wanaongoza orodha za juu kwa kufuatiliwa Instagram, ambapo baada ya Ronaldo na Messi anayefuatia ni nyota wa kimataifa wa Brazil Neymar, huku nyota wa mpira wa kikapuu NBA LeBron James naye akiwepo kwenye top 10.
BEKI wa kuhsoto wa Manchester United, Luke Shaw anatarajiwa kukosa mechi zote zilizosalia msimu huu kutokana na kupata majeruhi ya mguu. Shaw mwenye umri wa miaka 21, anatarajia kuonwa na wataalamu ili kujua ukubwa wa tatizo lake baada ya Jumatatu kubainika kuwa alipata matatizo kwenye ngano ya goti lake. Beki huyo wa kimataifa wa Uingereza alitolewa uwanjani baada ya kupita dakika tisa katika mchezo wa Jumapili iliyopita uliomalizika kwa sare ya bao 1-1 dhidi ya Swansea City huko Old Trafford. Mapema jana, akizungumza na wanahabari meneja wa United Jose Mourinho alithibitisha kuwa Shaw hatacheza tena msimu huu.
MENEJA wa Arsenal, Arsene Wenger amebainisha kuwa ilibaki kidogo amsajili Kylian Mbappe kutoka klabu ya Monaco mwaka jana. Nyota huyo mwenye umri wa miaka 18, amekuwa akizivutia klabu mbalimbali toka apate nafasi ya kucheza katika kikosi cha kwanza cha Monaco, akifunga mabao 24 katika mechi 39 alizoichezea timu hiyo msimu huu. Mbappe alikuwa tayari akiwindwa toka Machi mwaka 2016 wakati apovunja rekodi ya Thierry Henry ya kuwa mchezaji mdogo kabisa kuifungua bao Monaco katika mchezo dhidi ya Troyes na wakati huo Wenger alishaanza mchakato wa kumuwania. Akizungumza na wanahabari kuhusiana na hilo, Wenger amesema ni kweli alijaribu kumsajili chipukizi huyo kwasababu alikuwa akikaribia kumaliza mkataba wake lakini Monaco walifanikiwa kumuongeza mkataba mwingine. Mbappe alikuwa sehemu ya kikosi cha Monaco kilichochabangwa mabao 2-0 katika mchezo wao wa mkondo wa kwanza wa nusu fainali ya Ligi ya Mabingwa Ulaya dhidi ya Juventus jana.
MSHAMBULIAJI nyota wa Monaco, Radamel Falcao amesema hana mpango wowote wa kuondoka katika klabu hiyo ambayo inafukuzia mataji mawili msimu huu, la Ligue 1 na Ligi ya Mabingwa Ulaya. Nyota huyo wa kimataifa wa Colombia amekuwa na mafanikio makubwa Monaco toka arejee baada ya kushindwa kufanikiwa alipopelekwa kwa mkopo Manchester United na Chelsea. Toka msimu huu umeanza, Falcao amefanikiwa kufunga mabao 28 katika mechi 38 za mashindano yote akiwa na klabu hiyo. Ingawa mkataba wake unamalizika mwishoni mwa msimu huu, Falcao anaonekana hana mpango wowote wa kuondoka Monaco. Akizungumza na wanahabari kuhusiana na hilo, Falcao amesema anajisikia vizuri Monaco na familia yake tayari imeshazoea mazingira ya hapo hivyo hadhani kama atakwenda popote. Falcao mwenye umri wa miaka 31, anashika nafasi ya tatu katika orodha ya wafungaji bora wa ligi msimu huu akiwa na mabao 19 nyuma ya Alexandre Lacazette mwenye mabao 24 na Edinson Cavani mwenye mabao 31.
NAHODHA wa timu ya taifa ya Uholanzi, Arjen Robben amefanikiwa kufikia rekodi ya nguli wa zamani wa nchi hiyo Johan Cruyff ya kutwaa mataji 10 ya ligi, kufuatia Bayern Munich kutwaa taji lake la tano mfululizo la Bundesliga mwishoni mwa wiki iliyopita. Baada ya Bayern kujihakikishia kutwaa taji hilo kwa ushindi mnono wa mabao 6-0 dhidi ya Wolfsburg, Robben aliwaambia wanahabari aliokuwa akizungumza nao kuwa amesikia amefikia rekodi ya nguli wa soka wa wakati wote wa Uholanzi. Robben amesema amefurahi kuona kuwa sasa yeye pamoja na Cruyff kwa pamoja wamewahi kutwaa mataji 10 ya ligi hivyo anajivunia sana mafanikio hayo. Robben mwenye umri wa miaka 33 jumla amewahi kushinda mataji sita ya Bundesliga akiwa na Dortmund, mawili na Chelsea, moja la La Liga akiwa na Real Madrid na lingine la Ligi Kuu ya Uholanzi.
MKURUGENZI wa michezo wa Borussia Dortmund, Michael Zorc amethibitisha kuwa Shinji Kagawa amepewa ofa ya mkataba mpya na klabu hiyo. Nyota huyo mwenye umri wa miaka 28 amekuwa katika kiwango bora katika kikosi cha Dortmund baada ya kuanza kwa kusuasua mapema mwanzoni mwa msimu. Dortmund wanaonekana kuridhishwa na kiwango kilichoonyeshwa na nyota huyo wa kimataifa wa Japan na watazungumza naye kuhusu kumuongeza mkataba mwingine kufuatia ule wa sasa kutarajiwa kumaliza mwakani. Akizungumzia kuhusu suala hilo, Zorc amesema watazungumza na Kagawa na wakala wake halafu wataona na uelekeo upi mazungumzo hayo yatakwenda. Kagawa ambaye alirejea kutoka Manchester United Agosti mwaka 2014 amefanikiwa kufunga mabao mawili na kusaidia mengine manne katika mechi tisa zilizopita za mashindano yote akiwa na Dortmund.
