KLABU ya Chapecoense imefanikiwa kushinda taji lake la kwanza toka timu wachezaji wa timu hiyo walipofariki katika ajali ya ndege. Ni wachezaji watatu pekee wa klabu hiyo ya Brazil waliopona kwenye ajali iliyotokea Novemba mwaka jana ambapo watu 71 kati ya 77 walifariki dunia. Klabu kubwa kutoka Brazil na Argentina zilijitolea wachezaji wao kwa mkopo kwenda Chapecoense, ambao walisajili wachezaji wapya 25 na kuwapandisha wengine tisa kutoka timu ya vijana. Klabu hiyo imetwaa taji la ubingwa wa jimbo la Santa Catarina jana ikiwa ni mwaka wa pili mfululizo kufanya hivyo. Kocha mpya wa Chapecoense amesema ubingwa huo waliopata ni maalumu kwa ajili ya wachezaji na viongozi waliopoteza maisha kwenye ajali ya ndege.
MSHAMBULIAJI nyota wa Arsenal, Alexis Sanchez amedai kuwa atajadili mustabali wake na meneja Arsene Wenger pindi msimu wa Ligi Kuu utakapofikia kikomo. Sanchez ambaye mkataba wake unamalizika Juni mwaka 2018, amekuwa akihusishwa na tetesi za kuondoka Emirates huku Bayern Munich ikitajwa kama moja ya klabu zinazomuwania. Akizungumza na wanahabari kuhusiana na mustakabali wake, Sanchez amesema kwasasa anataka kuweka nguvu zake katika kuisaidia timu kufuzu michuano ya Ligi ya Mabingwa Ulaya na pia kutwaa taji la Kombe la FA. Sanchez aliendelea kudai kuwa msimu uatkapomalizika ndipo anaweza kukaa na Wenger na kuanza kujadili kuhusu mustakabali wake wa baadae.
MSHAMBULIAJI nyota wa kimataifa wa Argentina, Lionel Messi yuko huru kuitumikia nchi yake katika mechi za kufuzu Kombe la Dunia baada ya adhabu yake ya kufungiwa mechi nne kutenguliwa katika rufani. Nyota huyo wa Barcelona mwenye umri wa miaka 29, alifungiwa kufuatia kumtolea maneno machafu mwamuzi wa pembeni wakati wa mchezo ambao Argentina waliifunga Chile kwa bao 1-0 machi mwaka huu. Adhabu hiyo ilimfanya Messi kukosa mchezo mmoja wa kufuzu ambao Argentina walitandikwa mabao 2-0 na Bolivia. Kamati ya rufani ya FIFA imesema ingawa kitendo alichofanya hakikubaliki lakini hakuna ushahidi kamili kama nyota huyo alidhamiria kumtolea maneno hayo mwmauzi. Faini ya paundi 7,800 aliyotozwa Messi katika adhabu hiyo nayo pia imeondolewa.
MSHAMBULIAJI wa Manchester City, Sergio Aguero na beki John Stones wanatarajiwa kukosa mchezo dhidi ya Crystal Palace utakaofanyika kesho. Meneja wa City, Pep Guardiola pia amethibitisha kipa Claudio Bravo anatarajiwa kukosa msimu wote uliosalia kufuatia majeruhi ya mguu aliyopata katika mchezo wa Manchester Derby. Aguero alipata majeruhi ya nyonga mwishoni mwa wiki iliyopita katika sare ya mabao 2-2 dhidi ya Middlesbrough, na ingawa vipimo vimeonyesha hakuumia sana lakini hatarajiwi kuwa fiti kwa ajili ya mchezo huo wa kesho. Akizungumza na wanahabari, Guardiola alithibitisha suala hilo na kuongeza kuwa Aguero anaweza kurejea uwanjani kwa ajili ya mchezo ujao dhidi ya Leicester City.
KOCHA Gregorio Manzano wa Hispania amekuwa mmoja kati ya mameneja wanaolipwa zaidi duniani baada ya kukubali kwenda kuinoa klabu ya Guizhou Zhicheng inayoshiriki Ligi Kuu ya China. Kwa mujibu wa taarifa kutoka China, kocha huyo wa zamani wa Sevilla na Atletico Madrid, amesaini mkataba wenye thamani ya euro milioni 8 kwa mwaka huku kibarua chake kikubwa kikiwa ni kuhakikisha Guizhou Zhicheng haishuki daraja. Manzano alikaririwa akidai kuwa mmiliki wa klabu hiyo Wen Wei anataka kuhakikisha timu yake haishuki daraja kwa gharama yeyote na ana matumaini hatamuangusha kutimiza malengo yake hayo. Klabu hiyo ambayo imepoteza mechi zake tatu za mwanzo wa msimu mpya, ilifanikiwa kupata ushindi wake wa kwanza wa mabao 3-1 dhidi Guangzhou R&F Ijumaa hii. Manzano sasa analingana na meneja wa Chelsea Antonio Conte ambaye naye analipwa kiasi kama hicho kwa mwaka.
MENEJA wa Sunderland, David Moyes amesema ataendelea kuinoa klabu hiyo msimu ujao pamoja na kushuka daraja. Sunderland wamekuwa na msimu mbaya, kufuatia kufanikiwa kushinda mechi tano pekee hivyo kujikuta wakishuka daraja huku kukiwa kumebaki mechi nne ligi kumalizika. Akizungumza na wanahabari, Moyes amesema anafahamu ni jambo gani la kufanya ili kuhakikisha wanarejea katika Ligi Kuu. Meneja huyo raia wa Scotland pia amesema mshambuliaji Jermain Defoe ambaye amefunga mabao 14 msimu huu, anaweza kuondoka.
MENEJA wa Manchester United, Jose Mourinho amesema atawapumzisha wachezaji wake katika mchezo wao wa Ligi Kuu dhidi ya Arsenal Jumapili hii. Ushindi wa bao 1-0 waliopata United katika mchezo wao wa nusu fainali ya mkondo wa kwanza ya Europa League dhidi ya Celta Vigo jana, unakuwa mchezo wao wa 10 kucheza toka Aprili mosi. Kufuatia United kushika nafasi ya tano katika msimamo wa ligi, michuano ya Europa League inaweza kuwapa nafasi nzuri ya kufuzu michuano ya Ligi ya Mabingwa Ulaya msimu ujao. Akizungumza na wanahabari, Mourinho amesema wachezaji ambao wamecheza mechi nyingi hatawatumia katika mchezo wao wa Jumapili hii. Kama United wakifanikiwa kutinga fainali ya michuano hiyo itakayofanyika jijini Stockholm Mei 24, utakuwa ni mchezo wao wa 64 msimu huu.
