MANCINI ATIMKIA ZENIT ST PETERSBURG.

KLABU ya Zenit St Petersburg imemteua meneja wa zamani wa Manchester City Roberto Mancini kuwa meneja wake mpya kwa mkataba wa miaka mitatu. Mancini mwenye umri wa miaka 52, mshambuliaji wa zamani wa kimataifa wa Italia, anachukua nafasi ya Mircea Lucescu ambaye alitimuliwa wiki iliyopita baada ya kuiongoza timu hiyo kwa msimu mmoja. Zenit walimaliza katika nafasi ya tatu katika msimo wa Ligi Kuu ya Urusi na kukosa nafasi ya kufuzu michuano ya Ligi ya Mabingwa Ulaya. Mancini alishinda taji la Ligi Kuu akiwa na City mwaka 2012, na hivi karibuni alitoka kuinoa Inter Milan. Meneja huyo raia wa Italia ambaye aliondoka Inter kwa makubaliano mwaka jana, anaweza kuongeza miaka miwili zaidi katika mkataba wake Zenit.

AJAX YAIMARISHA SAFU YAKE YA USHAMBULIAJI.

KLABU ya Ajax Amsterdam imetangaza kukamilisha usajili wa Klaas-Jan Huntelaar na kumpa mkataba wa mwaka mmoja. Mshambuliaji huyo mkongwe alikuwa huru baada ya kuondoka Schalke 04 mwishoni mwa msimu huu na sasa amerejea tena Asterdam Arena. Ajax walikuwa wakitaka kuongeza mshambuliaji mwingine ili kusaidiana na mshambuliaji wao kiongozi Kasper Dolberg. Huntelaar mwenye umri wa miaka 33 aliwahi kuichezea Ajax mwaka 2006 mpaka 2008 na kufanikiwa kufunga mabao 105 katika mechi 136 za mashindano yote. Baada ya kutoka Ajax, Huntelaar amewahi kuzitumikia Real Madrid, AC Milan na Schalke.

ATLETICO YAFUNGIWA KUSAJILI KIANGAZI BAADA YA KUPOTEZA RUFANI YAO CAS.

KLABU ya Atletico Madrid imepoteza rufani yao waliyokata katika Mahakama ya Kimataifa ya Michezo-CAS kupinga adhabu ya kuzuiwa kusajili na Shirikisho la Soka Duniani-FIFA. Hatua hiyo sasa inamaanisha kuwa klabu hiyo haitaruhusiwa kusajili mpaka itakapofika usajili wa dirisha doko Januari mwaka 2018. Atletico na mahasimu wao wa jiji Real Madrid walifungiwa kusajili kwa vipindi viwili vya usajili kwa kosa la kukiuka sheria ya usajili wachezaji wa kigeni wenye umri wa chini ya miaka 18. Baada ya kushindwa rufani yao FIFA, Atletico walitumikia adhabu ya kutosajili katika dirisha la Januari mwaka huu kabla ya kuamua kukata rufani CAS. Kutokana na matokeo ya rufani yao Atletico sasa watakuwa wameshindwa kufanya usajili wowote kwa mwaka huu.

MAN CITY YAKAMILISHA USAJILI WA PILI.

KLABU ya Manchester City imefanikiwa kufanya usajili wake wa pili katika kipindi hiki cha majira ya kiangazi kwa kukamilisha uhamisho wa kipa wa Benfica Ederson. Usajili huo unamfanya kipa huyo wa kimataifa wa Brazil kuwa mchezaji wa pili wa bafasi yake kusajili kwa fedha nyingi katika historia. Ederson mwenye umri wa miaka 23 ameigharimu City kitita cha paundi milioni 35 na kumfanya kuwa kipa wa pili ghali katika historia baada ya Gianliugi Buffon aliposajili kwenda Juventus akitokea Parma mwaka 2001. Ederson alisafiri kwenda Manchester Jumatatu na Jumanne alitua katika uwanja wa mazoezi wa City kukamilisha vipimo vya afya na kufanya mahojiano na vyombo vya habari vya klabu. City sasa wanakuwa wameshatumia kitita cha paundi milioni 78, baada ya klabu hiyo pia kutangaza kumnasa kiungo wa Monaco Bernardo Silva kwa kitita cha paundi milioni 43 Ijumaa iliyopita.

RONALDO AMFAGILIA MESSI.

MSHAMBULIAJI wa Real Madrid, Cristiano Ronaldo amemsifu Lionel Messi na amesema anafurahia kumtizama akicheza nyota huyo wa Barcelona. Nyota hao wawili ndio wamekuwa wakitawala tuzo ya mchezo bora wa dunia kwa kipindi cha miaka tisa iliyopita na kila msimu wamekuwa wakifananishwa. Ronaldo ambaye kikosi chake cha Madrid kinatarajiwa kupambana na Juventus katika fainali ya Ligi ya Mabingwa Ulaya Jumamosi hii, amesema Messi ni miongoni mwa wachezaji ambao huvutiwa kuwatizama wakicheza. Ronaldo amesema huwa anafurahia kuwatizama wachezaji wote wazuri na Messi ni mmojawapo.

MABAKI YA GARRINCHA YAIBWA.

Garrincha (kushoto) akiwa na Pele (kulia) enzi za uhai wake. 

FAMILIA ya nguli wa zamani wa soka wa Brazil, Garrincha imedai kuwa mabaki ya mpendwa wao yamepotea. Mabaki ya winga huyo ambaye alifariki dunia mwaka 1983 akiwa na umri wa miaka 49, yanadaiwa kuwa yanaweza kuwa yalipotea kwa kufukuliwa. Garrincha aliichezea Brazil mechi 50 kati ya mwaka 1955 mpaka 1966 na kulisaidia taifa hilo kutwaa Kombe la Dunia mwaka 1958 na 1962 wakati walipgawana kiatu cha dhahabu. Binti yake Rosangela Santos amesema baba yake hastahili hilo na ni jambo ambalo linakasirisha kutojua mabaki yake yalipo. Binti huyo aliendelea kudai kuwa meya alihidi kumtengenezea kaburi la kumbukumbu lakini wanahitajika kutafuta mabaki yake kwanza.

TAIFA STARS YAENDELEA KUJIFUA MISRI.

KIKOSI cha timu ya taifa ya Tanzania, Taifa Stars kimewasili nchini Misri kwa ajili ya kambi yao ya mazoezi ya wiki moja. Mara baada ya kuwasili kikosi hicho kilipumzishwa kabla ya kuanza mazoezi jana usiku chini ya kocha wake Salum Mayanga. Akizungumza wakati wa mazoezi hayo jana usiku, Mayanga amesema walifanya mazoezi kwa saa mbili na wataendelea hivyo kwa kipindi chote watakachokuwa huko. Stars inajiwinda na mchezo wake wa kufuzu michuano ya Mataifa ya Afrika mwaka 2019 dhidi ya Lesotho ambao unatarajiwa kufanyika katika Uwanja wa Taifa, Dar es Salaam Juni 10 mwaka huu.