KLABU ya Arsenal, imetangaza kuwa beki wa kushoto Sead Kolasinac anatarajia kujiunga nao kipindi hiki cha majira ya kiangazi akitokea Schalke 04 ya Ujerumani. Nyota huyo wa kimataifa wa Bosnia-Hrzegovina mwenye umri wa miaka 23, anatarajiwa kujiunga na Arsenal akiwa mchezaji huru na kuwa mchezaji wa kwanza kujiunga na timu hiyo pindi dirisha la usajili wa kiangazi litakapofunguliwa Julai mosi mwaka huu. Katika taarifa yake, Arsenal ilidai kuwa beki huyo anatarajia kuanza mazoezini kwa ajili ya msimu mpya mwezi ujao. Nao Schalke walithibitisha kuondoka kwa nyota wao huyo na kuongeza kuwa amepewa mkataba na Arsenal unaomalizika mwaka 2022.
MENEJA wa Manchester United, Jose Mourinho anadaiwa kujipanga kutenga kitita cha paundi milioni 50 kwa ajili ya mshambuliaji Alexandre Lacazette. Mourinho amehamisha nguvu zake kutoka kwa Antoine Griezmann aliyemtengea kitita cha paundi milioni 87 na kwenda mshambuliaji huyo wa Olympique Lyon kufuatia Atletico Madrid kufungiwa kusajili kiangazi hiki. Kushindwa kwa rufani ya Ateltico katika Mahakama ya Michezo ya Kimataifa-CAS, kumepelekea Atletico kuzuiwa kusajili kipindi hiki cha kiangazi hivyo kuondoa uwezekano wa kuweza kumruhusu Griezmann aondoke. Arsenal nao walikuwa wakimuhitaji Lacazetti lakini mwenyewe alikaririwa hivi karibuni akidai kuwa anataka timu inayoshiriki michuano ya Ligi ya Mabingwa Ulaya. Nyota huyo wa kimataifa wa Ufaransa amefunga mabao 37 msimu huu, huku pia akifunga mabao 23 na 31 katika msimu miwili iliyopita.
TAARIFA kutoka nchini Uingereza, zinadai kuwa kiungo wa Arsenal Mesut Ozil yuko tayari kusaini mkataba mpya na klabu hiyo. Taarifa hizo zinadai kuwa Ozil amekubali kupokea kitita cha paundi 280,000 kwa wiki badala ya paundi 350,000 kama ilivyokuwa ikidaiwa awali. Sababu kubwa za kuongeza mkataba mpya zinadaiwa ni kutokana na kutopata ofa yeyote makini kueleka kipindi hiki cha msimu wa mwisho wa mkataba wake. Mkataba mpya wa muda mrefu na kiungo huyo wa zamani wa Real Madrid inaweza kuwa mwanzo mzuri kwa Arsene Wenger ambaye naye amesaini mkataba wa miaka miwili.
KLABU ya Liverpool, inadaiwa kuwa tayari kuimarisha ofa yao kwa Mohamed Salah baada ya ile ya paundi milioni 28 kukataliwa. Liverpool walitoa ofa hiyo baada ya kuzungumza na klabu ya AS Roma kuhusu nia yao ya kutaka kumsajili winga huyo wa zamani wa Chelsea lakini taarifa zinadai kuwa ofa hiyo ilikataliwa. Nyota huyo wa kimataifa wa Misri amekuwa akiwindwa na Liverpool ambao wanatafuta mchezaji mzuri anayweza kucheza pembeni katika kipindi hiki cha usjaili wa kiangazi. Meneja wa Liverpool anadaiwa kupewa kitita cha paundi milioni 150 kabla ya kwenda kucheza hatua ya mtoano kutafuta nafasi ya kutinga hatua ya makundi ya michuano ya Ligi ya Mabingwa Ulaya msimu ujao. Salah ameifungia Roma mabao 19 akitokea pembeni msimu huu na kumfanya kuwaniwa na klabu kadhaa za Ulaya ambapo itaifanya Liverpool kutafuta walau paundi milioni 40 ili kunasa saini yake.
MSHAMBULIAJI nyota wa Atletico Madrid, Antoine Griezmann ameripotiwa kufanya mawasiliano na Manchester United baada ya rufani ya usajili wa klabu yake kutupiliwa mbali. Mahakama wa Michezo ya Kimataifa-CAS ilithibitisha kuwa adhabu ya kutosajili ya Atletico itaendelea kubaki kama ilivyo jana hivyo kumaanisha kuwa klabu hiyo iliyo chini ya Diego Simeone haitaweza kusajili mchezaji mpya mpaka Januari mwakani. Nyota huyo wa kimataifa wa Ufaransa, anadaiwa kufanya mawasiliano na United na kuwahabalisha kuwa hataondoka Atletico kipindi hiki cha kiangazi. Atletico walikuwa wakiwafukuzia Alexandre Lacazette na Diego Costa ili kuchukua nafasi ya Griezmann mwenye umri w amiaka 26 msimu ujao, lakini sasa klabu hiyo haitaweza kupata mbadala wake hivyo kuamua kumbakisha.
KLABU ya Arsenal, inadaiwa kukataliwa ofa yao ya paundi milioni 87 kwa ajili ya mshambuliaji wa Monaco Kylian Mbappe. Monaco inataka kumbakisha chipukizi huyo mwenye umri wa miaka 19 kufuatia pia kudaiwa kukataa ofa ya paundi milioni 105 kutoka Real Madrid. Kwa mujibu wa taarifa zilizotolewa na gazeti la Telegraph, kuna klabu nyingine ya tatu ambayo pia ofa yao imekataliwa. Klabu kadhaa kubwa Ulaya zimekuwa zikimfukuzia Mbappe zikiwemo Manchester United, Manchester City, Chelsea, Bayern Munich na Paris Saint-Germain-PSG.
TIMU ya mpira wa kikapu ya Golden State Warriors imefanikiwa kuanza vyema mechi zake za fainali ya NBA kwa kuwachapa mabingwa watetezi Cleveland Cavaliers kwa vikapu 113-91. Nyota katika mchezo huo alikuwa Kevin Durant aliyeifungia Warriors alama 38 huku Stephen Curry akiongeza mitupo sita ya mbali yenye alama tatu kila mmoja. Mpaka robo mbili za kwanza zikimalizika, Warriors walikuwa mbele kwa vikapu 60-52 kabla ya kuendeleza kasi yao katika robo mbili za pili na kuibuka na ushindi huo. Warriors walitwaa taji la NBA mwaka 2015 kwa kuwafunga Cavaliers lakini walijikuta wakiteleza wakiwa na wanaongoza kwa 3-1 katika fainali za mwaka jana na kuwafanya Cavaliers kutwaa taji lao la kwanza. Timu hizo zinatarajiwa kukutana tena huko Oakland Jumapili hii katika fainali ya pili kati ya saba zitakazochezwa.
