WACHEZAJI soka ambao huwa wanapenda kujirusha nchini Uingereza wanaweza kukabiliwa na adhabu ya kufungiwa kuanzia msimu ujao. Chama cha Soka cha Uingereza-FA kinatarajia kupiga kura kuhusiana na suala hilo katika mkutano wake mkuu wa mwaka unaofanyika leo na kuna kila dalili kuwa ombi hilo litapitishwa. FA itahitahi kuungwa na Ligi Kuu, Ligi ya Soka la Uingereza na Chama cha Wachezaji wa Kulipwa ili mabadiliko hayo yaweze kupita. Kama sheria hiyo ikipita, jopo maalumu la FA litakuwa likikaa kupitia mechi zilizochezwa mwishoni mwa wiki kuona kama kuna tukio kama hilo na kuchukulia hatua. Sheria hiyo itakuwa ikifanya kazi hata kama mwamuzi wa mchezo hakuona tukio na kuliandika kwenye taarifa yake.
KIUNGO wa kimataifa wa Ujerumani, Julian Draxler amedai kuwa kiungo wa Arsenal Mesut Ozil anapaswa kujiunga na Paris Saint-Germain-PSG. Ozil amebakisha mwaka mmoja katika mkataba wake na Arsenal, huku meneja Arsene Wenger akisubiri msimu umalizike ili waweze kujadili masuala ya mkataba ya mpya. Draxler ambaye amesema alikataa ofa ya kwenda Ligi Kuu ya Uingereza kwa ajili ya PSg Januari mwaka huu, amesema Ozil atafurahia maisha jijini Paris. Akizungumza na BBC, Draxler amesema angependa kucheza na Ozil kila siku kwani kwa upande wake ni mchezaji mkubwa. Draxler aliendelea kudai kuwa anafurahia anapokuwa naye mazoezi na kwenye mechi wakiwa katika majukumu ya kimataifa na Ujerumani.
MENEJA wa Arsenal, Arsee Wenger amesisitiza kipa wa Sunderland Jordan Pickford hayuko katika mipango yao kwani klabu hiyo ina watu wa kutosha kujaza nafasi hiyo. Pickford amekuwa kwenye kiwango cha juu pamoja na msimu mbovu wa Sunderland iliyoshuka daraja na kulikuwa na na taarifa kuwa Arsenal wamekuwa wakimuwania kipa huyo. Kipa huyo mwenye umri wa miaka 23 alionyesha kiwango kikubwa kwa kuokoa michomo kadhaa katika ushindi wa mabao 2-0 waliopata Arsenal jana kwenye mchezo wa Ligi Kuu. Hata hivyo, Wenger amesema Pickford ambaye pia amekuwa akihusishwa na tetesi za kuwindwa na Manchester City na Manchester United, atapata ushindani mkubwa sana Emirates. Meneja huyo aliendelea kudai kuwa Arsenal kwasasa hadhani kama inahitaji kipa kwani waliopo wanatosha kwa nafasi zao.
KOCHA mpya wa timu ya taifa ya Ghana, Black Stars, Kwasi Appiah amemuacha nahodha wa kikosi hicho Asamoah Gyan kuendelea kushikilia nafasi yake hiyo. Kufuatia ujio wa Appiah mjadala mkubwa ulikuwa umezuka kuwa nani haswa kocha huyo atamchagua kama nahodha kwneye kikosi chake. Akizungumza na wanahabari, Appiah amesema hakuna lolote lililobadilika hivyo kumaanisha kuwa kutakuwa hakuna mabadiliko yeyote kwenye nafasi ya unahodha wa timu. Appiah alifafanua kuwa kama Gyan akiwa mgonjwa au majeruhi nahodha msaidizi Andre Ayew atashika nafasi hiyo na hivyo ndivyo imekuwa kwa miaka mingi sasa.
MSHAMBULIAJI wa Real Madrid, Karim Benzema bado hajakata tama na kurejea tena katika kikosi cha timu ya taifa ya Ufaransa pamoja na kuachwa na kocha Didier Deschamps kufuatia kashfa ya mkanda wa ngono miezi 18 iliyopita. Benzema alisimamishwa kuitumikia Ufaransa Desemba mwaka 2015 baada ya kushitakiwa kwa tuhuma za kuwa na ushirikiano na watu waliokuwa wakimsumbua mchezaji mwenzake Mathieu Valbuena juu ya mkanda huo wa ngono. Octoba mwaka jana rais wa Shirikisho la Soka la Ufaransa-FFF, Noel Le Draet alidai kuwa ni ruksa kwa Deschamps kumuita kwenye kikosi chake Benzema kama aataona anamfaa. Benzema mwenye umri wa miaka 29 ambaye ahajaitwa toka Ufaransa ilipoifunga Armenia mabao 4-0 Octoba mwaka 2015, amesema bado hajapata ufafanuzi wowote kutoka kwa Deschamps wa kwanini anaendelea kumuacha kwenye kikosi chake.
WAMILIKI wa Leicester City, King Power International wamekubali kuinunua klabu ya OH Leuven ya Ubelgiji. Klabu hiyo ya daraja la pili, inatoka mashariki mwa mji mkuu wa Ubelgiji, Brussels, na iliepuka kidogo kushuka daraja la tatu msimu huu. Bodi ya klabu hiyo iliweka muda wa kutafuta mwekezaji na kudai kuwa King Power ndio mzabuni pekee ambaye aliweka wazi mipango yake kwenye maombi yaliyotumwa. OH Leuven ilishuka kutoka Ligi Kuu ya Ubelgiji msimu wa 2015-2016 lakini wamedai kuwa mmiliki mpya atawawezesha kiuchumi ili kuhakikisha wanarejea Ligi Kuu haraka iwezekanavyo.
BEKI wa Bayer Leverkusen, Benjamin Henrichs amesaini mkataba mpya ambao utamuweka katika klabu hiyo mpaka Juni mwaka 2022. Nyota huyo mwenye umri wa miaka 20, mkataab wake wa sasa ulikuwa unamalizika mwaka 2020 na Manchester City sambamba na Bayern Munich wote wanaaminika kumuwania kiungo huyo. Lakini Henrichs sasa amemaliza tetesi zote zilizozagaa kwa kuongeza mkataba wa miaka miwili na Leverkusen. Akizungumza na wanahabari beki huyo wa kulia amesema ni jambo kubwa kwa klabu hiyo ambayo amekuwa akiitumikia kwa kipindi cha miaka 13 kumpa nafasi nyingi. Henrichs aliendelea kudai kuwa anafurahi kwa kuwa mchezaji rasmi wa kulipwa katika klabu hiyo na hata kuitwa katika timu ya taifa ya Ujerumani.
