CHELSEA YAWANASA DRINKERWATER NA ZAPPACOSTA DAKIKA ZA MAJERUHI

MABINGWA wa Ligi Kuu Uingereza, Chelsea imekamilisha usajili uliokuwa na changamoto nyingi Alfajiri ya leo kwa kuwanasa kiungo Danny Drinkwater kutoka Leicester City na beki wa kulia wa kimataifa wa Italia Davide Zappacosta kutoka Torino. Meneja wa Chelsea Antonio Conte alishuhudia mawindo yake kadhaa yakishindikana katika muda wa mwishoni wa usajili wa kipindi hiki cha kiangazi lakini alifanikiwa kuimarisha kikosi chake kuelekea michuano ya Ligi ya Mabingwa Ulaya. Drinkwater mwenye umri wa miaka 27 amesajiliwa kwa mkataba wa miaka mitano na ada inayokadiriwa kufikia paundi milioni 35, ambayo ilitangazwa saa mbili na nusu baada ya dirisha la usajili kufungwa jana usiku. Zappacosta mwenye umri wa miaka 25 amesajiliwa kwa mkataba wa miaka minne na Chelsea wametoa paundi milioni 23 kunasa saini ya beki huyo. Mbali na hao Chelsea pia ilifanikiwa kuwasajili mapema kipa Willy Caballero, beki Antonio Rudiger, kiungo Tiemoue Bakayoko na mshambuliaji wa kimataifa wa Hispania Alvaro Morata aliyejiunga nao kutoka Real Madrid kwa ada iliyovunja rekodi ya klabu ya paundi milioni 58.

COUTINHO AITAKATISHA BRAZIL

TIMU ya taifa ya Brazil, imefanikiwa kujihakikishia nafasi ya kumaliza kinara katika mechi za kufuzu michuano ya Kombe la Dunia huko Amerika Kusini baada ya kuichapa Ecuador jana wakati Chile na Argentina zikiendelea kusuasua kwa mara nyingine. Brazil ilishinda mchezo huo kwa mabao 2-0 yaliyofungwa na nyota wa Liverpool Philippe Coutinho ambaye usajili wake kwenda Barcelona ulikwama pamoja na Paulinho ambaye amesajili kipindi hiki cha kiangazi na Barcelona akitokea Shanghai Evergrande ya China. Ushindi huo unakuwa wa tisa mfululizo kwa Brazil na kuwapata mabingwa mara tano wa Kombe la Dunia uhakika wa kumaliza kinara kutokana na tofauti ya alama 11 ambazo haziwezi kufikiwa na timu nyingine. Timu nne kutoka ukanda huo ndio zinafuzu moja kwa moja michuano hiyo ijayo inayofanyika nchini Urusi mwakani huku ile ya tano ikienda kucheza hatua ya mtoano. Katika michezo mingine iliyochezwa mapema leo Alfajiri, Colombia walitoka sare tasa na Venezuela, Peru waliididimiza Bolivia mabao 2-1, Paraguay ikaishughulikia Chile kwa kuitandika mabao 3-0 na Argentina walitoka sare ya bila kufungana na Uruguay.

PALACE YAMCHUKUA SAKHO MOJA KWA MOJA

KLABU ya Crystal Palace imefanikiwa kumsajili beki wa kati Mamadou Sakho kutoka Liverpool kwa kitita cha paundi milioni 26. Ofa hiyo ilikuwa ya nne kwa Palace kwa ajili ya kumuwania beki huyo mwenye umri wa miaka 27 baada ya Jumanne kukataliwa ofa yao ya paundi milioni 25. Liverpool walieleza kuwa hawatakubali kuchukua ofa chini ya paundi milioni 30 kwa ajili ya nyota huyo wa kimataifa wa Ufaransa ambaye alicheza kwa mkopo Selhurst Park msimu uliopita. Akizungumza na wanahabari mara baada ya kumalika kwa usajili huo, Sakho amesema anapenda changamoto aliyopata msimu uliopita, ilikuwa vigumu lakini ilimvutia ndio maana akaona sehemu sahihi ya kwenda ni Palace kipindi hiki cha kiangazi.

PSG YAMCHUKUA MBAPPE KWA MKOPO

KLABU ya Paris Saint-Germain-PSG imefanikiwa kumsajili Kylian Mbappe kwa mkopo wa msimu mzima kutoka Monaco huku kukiwa na kipengele cha kumnunua kwa mkataba wa moja kwa moja kwa euro milioni 180. Kama PSG wakimsajili nyota huyo wa kimataifa wa Ufaransa kwa mkataba wa moja kwa moja, mkataba utakuwa unamalizika Juni mwaka 2022. Akizungumza na wanahabari, Mbappe amesema alikuwa akitaka kuwa sehemu ya mpango wa klabu hiyo ambayo ni moja ya klabu zenye kutaka mafanikio makubwa Ulaya. Kuchelewa kwa Mbappe kusaini mkataba wa kudumu kunadaiwa kumetokana na PSG kuogopa kuvunja sheria ya matumizi ya fedha ya Shirikisho la Soka la Ulaya-UEFA ambayo inavitaka vilabu vyote kutotumia zaidi ya fedha inayoingiza.

KUIONA STARS BUKU TANO

SHIRIKISHO la Mpira wa Miguu Tanzania (TFF), limetangaza viingilio vya mchezo kati ya Taifa Stars ya Tanzania na Botswana utakaofanyika Jumamosi Septemba 2, mwaka huu. 

Mchezo huo wa kirafiki wa kimataifa utakaofanyika kwenye Uwanja wa Uhuru, Dar es Salaam chini ya utaratibu wa kalenda ya Shirikisho la Kimataifa la Mpira wa Miguu (FIFA) viingilio vitakuwa Sh 10,000 kwa Jukwaa Kuu na Sh 5,000 kwa mzunguko.

Wakati huo huo, Kiungo Taifa Stars, Simon Msuva tayari amejiunga na timu hiyo akitokea Klabu ya Difaa El Jadidah ya Morocco baada ya Shirikisho la Soka Morocco na timu yake kumfanyia mpango wa visa ya muda mrefu iliyomwezesha kusafiri.

Mchezaji ambaye imeshindikana kuja ni Orgenes Mollel wa FC Famalicao ya Ureno. Sababu ni taratibu za ruhusa za kimataifa zinafanyiwa kazi kwa mujibu wa sheria za nchi ya Ureno ambako anacheza soka la kulipwa.

Nyota wengine walikwisha kuripoti ni pamoja na Nahodha Mbwana Samatta (KRC Genk/Ubelgiji), Elias Maguli (Dhofar FC/Oman), Abdi Banda (Baroka FC/Afrika Kusini), Hamis Abdallah (Sony Sugar/Kenya) wakati Farid Mussa wa CD Tenerif ya Hispania anatarajiwa kutua leo.

Wengine ambao wako kambini Hoteli ya Sea Scape iliyoko Kunduchi, Dar es Salaam ni makipa Aishi Manula (Simba SC), Mwadini Ally (Azam FC) na Ramadhani Kabwili (Young Africans).

Pia wamo Walinzi ni Gadiel Michael (Young Africans), Boniphas Maganga (Mbao FC), Kelvin Yondani (Young Africans), Salim Mbonde (Simba SC) na Erasto Nyoni (Simba SC).

Viungo ni Himid Mao – Nahodha Msaidizi (Azam FC), Mzamiru Yassin (Simba SC), Said Ndemla (Simba SC), Shiza Kichuya (Simba SC), wakati Washambuliaji ni Raphael Daud (Young Africans), Kelvin Sabato (Azam FC) na Emmanuel Martin (Young Africans).

Katika hatua nyingine, Botswana inatarajiwa kuingia usiku wa saa 3.00 kwa ndege ya Shirika la Ndege la Kenya (KQ) na watafikia Hoteli ya Urban Rose iliyoko katikati ya jiji la Dar es Salaam.

Botswana inayonolewa na David Bright inakuja na wachezaji 18 wakiwamo makipa Mampule masule, Noah Maposa na Antony Gouws.

Walinzi ni Letsweletse, Mosha Gaolaolwe, Simisane Mathumo, Thabang Mosigi, Lesenya Ramorake, Tapiwa Gadibolae na Bokani Leeton.

Viungo ni Alphonse Modisaotsile, Maano Ditshupo, Katlego Masole, Gift Moyo, Segolame Boy, Lemponye Tshireletso, Thero Setsile, Kabelo Seakanyeng,Jackson, Lemogang maswena.

Washambuliaji ni Tumisang Orebonye, Jarome Ramathakwane, Tebogo Sembowa, Hendric Moyo na Boipelo Oaitse.

RATIBA YA MAKUNDI YA EUROPA LEAGUE

Kundi A: Villarreal, Maccabi Tel Aviv, Astana, Slavia Prague.
Kundi B: Dynamo Kiev, Young Boys, Partizan Belgrade, Skenderbeu.
Kundi C: Sporting Braga, Ludogorets, Hoffenheim, Istanbul Basaksehir.
Kundi D: AC Milan, Austria Vienna , Rijeka, AEK Athens.
Kundi E: Lyon, Everton, Atalanta, Apollon Limassol.
kundi F: FC Copenhagen, Lokomotiv Moscow, Sheriff Tiraspol, FC Zlin.
Kundi G: Vitoria Plzen, Steaua Bucarest, Hapoel Beer-Sheva, FC Lugano.
Kundi H:Arsenal, BATE Borisov, Cologne, Red Star Belgrade.
Kundi I: Salzburg, Marseille, Vitoria Guimaraes, Konyaspor.
Kundi J: Athletic Bilbao, Hertha Berlin, Zorya Luhansk, Ostersund.
Kundi K: Lazio, Nice, Zulte Waregem, Vitesse Arnhem.
Kundi L: Zenit St Petersburg, Real Sociedad, Rosenborg, Vardar.

RATIBA YA MAKUNDI YA CHAMPIONS LEAGUE

Kundi A: Benfica, Manchester United, Basel, CSKA Moscow
Kundi B: Bayern Munich, Paris St-Germain, Anderlecht, Celtic
Kundi C: Chelsea, Atletico Madrid, Roma, Qarabag
Kundi D: Juventus, Barcelona, Olympiakos, Sporting
Kundi E: Spartak Moscow, Sevilla, Liverpool, Maribor
Kundi F: Shakhtar Donetsk, Manchester City, Napoli, Feyenoord
Kundi G: Monaco, Porto, Besiktas, RB Leipzig
Kundi H: Real Madrid, Borussia Dortmund, Tottenham, Apoel

LIVERPOOL YAMNYATIA SANCHEZ

KLABU ya Liverpool inadaiwa kujiandaa kumuwania kiungo wa Bayern Munich Renato Sanchez. Nyota huyo wa kimataifa wa Ureno ambaye alitua Allianz Arena majira ya kiangazi mwaka jana, anataka kutafuta timu atakayopata nafasi ya kucheza mara kwa mara na meneja Jurgen Klopp yuko tayari kufanikisha suala hilo. Sanchez ambaye alijizolea umaarufu mkubwa kutokana na kiwnago bora alichoonyesha katika michuano ya Ulaya akiwa na kikosi cha ushindi cha Ureno kiangazi mwaka jana, kwa kipindi kirefu amekuwa akihusishwa na tetesi za kuwaniwa na Manchester United. Bayern wanaweza kukubali kumuacha kwa mkopo kiungo huyo kwani bado wanamuhitaji nyota huyo mwenye umri wa miaka 20 kwa siku zijazo.

SPURS YAKARIBIA KUMNASA AURIER.

KLABU ya Tottenham Hotspurs inadaiwa kukubali kumsajili Serge Aurier kutoka Paris Saint-Germain-PSG kwa kitita cha paundi milioni 23 na beki huyo amefanyiwa vipimo vya afya jijini Paris. Lakini usajili wa beki huyo wa kimataifa wa Ivory Coast hautakamilika mpaka Aurier atakapopata kiali cha kufanya kazi Uingereza. Mabingwa Serie A Juventus bado wanamtaka beki huyo kwa mkopo kama akishindwa kuhamia Ligi Kuu. Nyota huyo wa PSG alinyimwa visa ya kuingia Uingereza kwa ajili ya mchezo wa Ligi ya Mabingwa Ulaya dhidi ya Arsenal Novemba mwaka jana kwasababu ya kuhukumiwa kwa kosa la kumshambulia polisi. Mawakili wake wanafanya kazi kutafuta suluhu la suala hilo ambalo ndio lilichangia Chelsea na Manchester United kuacha kuwania saini yake.

WEST BROM WANASA WINGA WA RB LEIPZIG.

KLABU ya West Bromwich Albion imemsajili winga wa kimataifa wa Scotland Oliver Burke kutoka RB Leipzig ya Ujerumani kwa kitita cha paundi milioni 15 na kumpa mkataba wa miaka mitano. Burke mwenye umri wa miaka 20, alikuwa mchezaji ghali zaidi kutoka Scotland wakati alipojiunga na klabu hiyo ya Bundesliga kwa kitita cha paundi milioni 13 Agosti mwaka 2016. Winga huyo amecheza mechi 25 za ligi msimu uliopita na kuisaidia Leipzig kufuzu makundi ya michuano ya Ligi ya Mabingwa Ulaya. Akizungumza na wanahabari baada ya uhamisho huo, Burke amesema anadhani sasa ni wakati wake wa kucheza mechi nyingi zaidi. Burke ambaye anaweza kuanza kwenye mchezo wa Ligi Kuu dhidi ya Stoke City Jumapili hii, anakuwa mchezaji wa nne kusajiliwa na West Brom kipindi hiki cha majira ya kiangazi.

DORTMUND YAKANUSHA KUMALIZANA NA BARCELONA

KLABU ya Borussia Dortmund imedai mapema leo kuwa hakuna makubaliano yeyote yaliyofikiwa kwa ajili ya uhamisho wa Ousmane Dembele kwenda Barcelona. Kauli hiyo ya Dortmund inakuja kufuatia taarifa kutoka nchini Ujerumani kudai kuwa tayari makubaliano baina ya pande hizo kwa ajili ya Dembele yamekamilika. Akizungumza na wanahabari, msemaji wa Dortmund amesema wamewapa muda Barcelona hivyo kuna kitu kinaweza kikatokea au kisitokee pia. Taarifa zingine zinadai kuwa Barcelona imekubali kutoa kitita cha euro milioni 120 hivuo kumfanya kuwa mchezaji wa pili ghali zaidi duniani baada ya Neymar.

BARCELONA KUMGEUKIA DI MARIA WAKIMSHINDWA COUTINHO

KLABU ya Barcelona inatarajiwa kugeukia kwa Angel Di Maria kama wakishindwa kumsajili Philippe Coutinho kutoka Liverpool. Kwa mujibu wa taarifa kutoka Catalan zimedai kuwa nafasi ya Barcelona kumsajili kiungo huyo wa Brazil imekuwa finyu hivyo kuna uwezekano klabu hiyo ikaamua kuachana naye. Kutokana na hilo Barcelona sasa inaweza kuhamishia nguvu zao kwa Di Maria ili waimarishe kikosi chao. Katika hatua nyingine, Afisa mkuu wa Borussia Dortmund, Hans-Joachim Watzke amedai kuwa nafasi ya Ousmane Dembele kujiunga na Barcelona ni chini ya asilimia 50. Watzke aliwaambia wanahabari kuwa kama Barcelona wanamtaka Osmane lazima walipe ada wanayotaka kwakuwa mchezaji huyo bado ana mkataba wa miaka minne.

ARSENAL HUENDA IKAMUUZA MUSTAFI

KLABU ya Arsenal inadaiwa kukataa ya mkopo kutoka Inter Milan kwa ajili ya beki wake wa kimataifa wa Ujerumani Shkodran Mustafi wiki iliyopita. Hata hivyo taarifa zinadai kuwa Arsenal wanaweza kukubali kumuuza beki huyo kama Inter wataweza kutoa kiasi cha milioni 35 ambacho walilipa wakati walimnyakuwa kutoka Valencia kiangazi mwaka jana. Mustafi amekuwa akipata kwenye kikosi cha kwanza cha Arsenal lakini amekuwa akipata tabu kidogo kuelewana na wachezaji wenzake hatua ambayo inaweza kupelekea suala la kuuzwa liwezekane. Kama Arsenal ikiamua kumuuza nyota huyo mwenye umri wa miaka 25, italazimika kutafuta mbadala wake ili kuimarisha safu yao ya ulinzi.

WEST BROM WAIKATIA RUFANI KADI NYEKUNDU YA ROBSON-KANU

KLABU ya West Bromwich Albion imekata rufani dhidi ya kadi nyekundu aliyoonyeshwa Hal Robson-Kanu katika ushindi wa bao 1-0 dhidi ya Burnley kwenye mchezo wa Ligi Kuu jana. Mshambuliaji huyo alitolewa nje dakika za mwishoni kufuatia kumchezea hovyo beki wa Burnley Matthew Lowton. Robson-Kanu ndiye aliyefunga bao pekee kwenye mchezo huo na kuifanya West Brom kuanza vyema mechi zao mbili za mwanzo za ligi. Taarifa ya West Brom imedai kuwa watatuma malalamiko yao kutokana na uamuzi huo kwenda Shirikisho la Soka la Uingereza-FA.

NEYMAR AWASHAMBULIA VIONGOZI WA BARCELONA

MSHAMBULIAJI wa Paris Saint-Germain-PSG, Neymar amewaponda wakurugenzi wa klabu yake ya zamani na kudai kuwa Barcelona inastahili viongozi bora zaidi yao. Akizungumza na wanahabari mara baada ya kufunga mabao mawili katika ushindi wa mabao 6-2 waliopata PSG dhidi ya Toulouse, Neymar amesema viongozi wa Barcelona waliopo madarakani hawastahili kuwepo hapo. Neymar aliandelea kudai kuwa amekaa Barcelona kwa miaka minne na amekuwa na furaha wakati wote lakini sio kwa viongozi wa klabu hiyo. Nyota huyo wa kimataifa wa Brazil amesema Barcelona inastahili uongozi bora zaidi na dunia nzima inafahamu hilo.

LIVERPOOL YAKATAA OFA YA TATU YA BARCELONA KWA COUTINHO

KLABU ya Liverpool imekataa ofa ya tatu kutoka Barcelona inayoamikika kufikia paundi milioni 114 kwa ajili ya Philippe Coutinho. Wiki iliyopita Liverpool walikataa ofa ya paundi milioni 90 kutoka kwa klabu hiyo ya La Liga ambapo baadaye nyota huyo wa kimataifa wa Brazil mwenye umri wa miaka 25 alituma maombi ya kuondoka. Coutinho amekosa mechi mbili za ufunguzi za Liverpool msimu huu kutokana na majeruhi ya mgongo, lakini klabu hiyo imeshaweka wazi nia yake kutotaka kumuuza kiungo huyo. Pamoja na kauli hiyo ya Liverpool, Barcelona bado wamekuwa wakidai kuwa wanakaribia kunasa saini ya kiungo huyo.

COSTA AENDELEA KUTOA POVU SAKATA LAKE NA CHELSEA

MSHAMBULIAJI wa kimataifa wa Hispania, Diego Costa amesema Chelsea wanataka kiasi ambacho Atletico Madrid hawataweza kukitoa kwa ajili ya kumalisha usajili wake wa kurejea kwenye klabu yake hiyo ya zamani.  Conte mwenye umri wa miaka 28 bado yuko nchini Brazil baada ya kutumia ujumbe mfupi Juni mwaka huu na meneja Antonio Conte akimwambia kuwa hatakuwepo katika mipango yake msimu huu. Chelsea walimsajili Costa kutoka Atletico kwa kitita cha paundi milioni 32 Julai mwaka 2014. Akizungumza na wanahabari huko Brasil, Costa amesema wakati alipokwenda Chelsea walilipa kiasi kidogo kulinganisha na wanachopewa hivi sasa. Nyota huyo aliendelea kudai kuwa anaona kama Chelsea wanamkomoa kwa kudai kiasi kikubwa cha fedha ili Atletico washindwe kumsajili jambo ambalo anaona sio sawa kwakuwa klabu hiyo imeshaweka wazi kuwa hawamuhitaji.

WEST BROM YAIWEKEA MTEGO MAN CITY KWA EVANS

MENEJA wa West Bromwich Albion, Tony Pulis, amesema klabu hiyo haina haja kumuuza nahodha wake Jonny Evans lakini mchezaji yeyote anaweza kuuzwa kama ofa muafaka ikitolewa. Kauli ya Pulis inakuja kufuatia West Brom kukataa ofa ya paundi milioni 18 kutoka Manchester City kwa ajili ya beki huyo mwenye umri wa miaka 29 ambaye amebakisha miaka miwili katika mkataba wake. Pulis amesema litakuwa jambo la ajabu kusema kuwa klabu hiyo haitauza mchezaji kama fedha nyingi ikitolewa. Meneja huyo aliendelea kudai kuwa pamoja na kwamba hawana shida sana na fedha lakini ofa nzuri zikija mezani wanaweza kuzijadili.

FINIDI GEORGE ATAFUTA KIBARUA NFF.

NGULI wa zamani wa soka wa kimataifa wa Nigeria, Finidi George ni miongoni mwa makocha 59 walioitwa kwenye usajili na Shirikisho la Soka la nchi hiy0-NFF kwa ajili ya kuziba nafasi mbalimbali kwenye timu za taifa. NFF ilithibitisha kuwa Finidi anatarajiwa kufanyiwa usaili huo Jumanne ijayo chini ya jopo la shirikisho hilo litakalokutana jijini Abuja. Haikuwekwa wazi ni nafasi gani haswa ambayo Finidi ameomba NFF, kwani nafasi zilizopo ni nyingi ikiwemo kocha wa timu za taifa za vijana chini ya 17, 20 na 23, makocha wasaidizi na makocha wa makipa. Finidi amekuwa akifanya kazi kama kocha wa timu ya vijana ya umri wa miaka 16 ya klabu ya Real Mallorca na ana leseni daraja A inayotambuliwa na Shirikisho la Soka la Ulaya-UEFA.

SPURS YAKARIBIA KUFANYA USAJILI WAKE WA KWANZA

KLABU ya Tottenham Hotspurs inadaiwa kukaribia kukamilisha usajili wake wa kwanza kipindi hiki cha majira ya kiangazi baada ya kukubali dili la kumsajili beki wa kati wa Ajax Amsterdam Davinson Sanchez. Spurs inatarajia kuvunja rekodi yao kwa kutoa kitita cha paundi milioni 42 kwa ajili ya chipukizi huyo mwneye umri wa miaka 21, ambaye amefunga mabao sita kwenye mechi 32 alizoichezea Ajax msimu uliopita na kupewa tuzo ya mchezaji bora wa mwaka wa klabu. Kama Spurs wakifanikiwa kumsajili watakuwa wamewatuliza mashabiki wao ambao walikuwa na wasiwasi kufuatia kuona juhudi zozote za usajili zinazofanyika. Spurs ambao walimaliza nafasi ya pili katika msimamo wa Ligi Kuu msimu uliopita, ndio timu pekee ambayo haijafanya usajili mpaka sasa.